Escandalazu

Esto sí que ye un escándalu, y non de Rafael, el cantante. El nuevu Hespital Central, el de la Cadellada (si faen memoria, aquel pal que'l PSOE distribuyó un carísimu folletu de propaganda de la maqueta nel 2002, ¡sí, nel 2002!), que yá sufriera un parón d'un añu, ente mediaos del 2007 y del 2008 porque les empreses constructores queríen que se-yos pagasen los sobrecostos polos reformaos y polos imprevistos del proyectu orixinal, vuelve sufrir un nuevu parón, porque les empreses esixen la garantía de cobru de nuevos sobrecostos.

Los alderiques de los años 2007 y 2008 resolviérense con un incrementu de 54,5 millones d'euros, que se vinieren a sumar a los 205,3 millones de la llicitación inicial, lo que vien representar un 25% de suba. Agora, según paez, les empreses reclamen una cantidá asemeyada. Si ello se cumpliere, los costos totales vendríen ser, de momentu, 500,6 millones, onde s'encloyaríen la obra civil del hespital (309,8 millones, col nuevu incrementu), 95,7 millones (equipamientu y mobiliariu), 24,2 millones (accesos a la A-66) y 8,6 millones pal denomáu "aniellu hespitalariu".

Además de lo escandaloso de los desvíos presupuestarios, el gobiernu asturianu -nel colmu la cara dura- diz que too ello nun ye responsabilidá suya, sinón de Gispasa (Gestión de Infraestructuras Sanitarias del Principado de Asturias), una empresa creada ad hoc pal hespital, que tien el capital de l'alministración asturiana y que preside'l Conseyeru d'Infraestuctures, el señor Buendía.

Y, per otru llau, y si ye verdá lo que se diz, les negociaciones pa la nueva suba llévales directamente don Luis del Rivero, cabezaleru de Sacyr -la principal empresa encargada de facer les obres del futuru hespital-, col presidente del gobiernu, don Vicente Alberto Álvarez Areces.

¡Qué manera de usar a les deleres de so les perres de los contribuyentes! ¡Que despreciu a la opinión pública'l decir qu'esa rodiella nun ye responsabilidá del gobiernu, sinón de Gispasa, que sería una sociedá privada! ¡Qué forma de xestión más sospechosa esa de les conversaciones ente don Luis y don Vicente!