¡Nin perres pa les escueles!

El retrasu n’apurrir les perres pa los gastos ordinarios a los centros d’educación asturianos muestra bien a les clares la situación de falta de liquidez del Gobiernu, situación causada nun sólo pola crisis sinón poles mentires coles que se vienen faciendo los presupuestos d’años sucesivos y la obligación que tienen tanto de reducir el capítulu de gastos (149 millones d’euros) como de facer al gobiernu del estáu la devolución de 180 millones d’euros cobraos de más nel exerciciu de 2009.

Otra vez lo mesmo: PSOE e IU nun son tola causa del problema, pero son parte importante del mesmu y, en tou casu, nun van ser inxamás la solución. Porque Asturies necesita crecer, non menguar. Y pa ello fai falta que’l dineru públicu nun s’emplegue solo pa sostener los tinglaos que tán en marcha nin pa dar perres a los probes que crea esta política desastrosa.

Fáganse una pregunta: tantísimos millones d’euros recibíos a lo llargo de tantes décades, ¿pa qué? La respuesta: pa que nun quede equí rapaz nin rapaza. Nin perres pa pagar los gastos ordinarios de los rapazos na escuela.

Eso sí, vamos fartanos de da-yos ordenadores a los rapacinos. ¿Pa qué? Si dempués, ente otres coses, les conesiones a interné de les escueles son de rabil, y va más rápído un llimiagu ente l’arena la playa que los ordenadores d’institutos y escueles.