«Pa ofrecételu a ti, dios de la güerta / Príapu, como a ti tamién, Silvanu, / que de sebes y finsos lleves cuenta»
Una güerta situada orielles del ríu Piles (el Piles ye, por ciertu, ún de los topónimos de Xixón que más lluegu apaecen n'antigüedá), probablemente la última güerta que queda «intra muros» de Xixón, esaniciaes va poco dalgunes d'El Coto y esapaecíes cuantayaque les arenoses lloses d'afamaes llechugues de lo que güei ye El Muro.
35 por 25 metros, aproximadamente, con orientación Norte-Sur. Nesti final de marzu, la mayor parte la faza ta en barbechu, ofreciendo a la vista na más el color buxu y negru de la tierra desnudo. Pero yá verdexen dalgunes plantes: una docena repollos, entá en fueyes abiertes; cuatro fileres d'ayos, que van medrando yá; unes cuantes llechugues tienres, amparaes de los páxaros con unes redes; una estaya de les feraces fabes de mayu; una trompaína d'acelgues col so verde brillante, y, pelos bordes, puyos de lo que más tarde van ser berces o repollos d'otres menes. Na vera del extremu norte, flores de delles tribes: caléndules, narcisos, margarites, y, n'espera d'españar en color y n'olor, los blancos jazmines, que dientru d'un mes van enllenar al transeúnte d'un prestosu arrecendor. Ente la grisácea tierra ensin semar tán ya preparaes, como tiendes de campaña, les cuques peles que dempués esguilarán, pioleteando colos sos zarciellos, fréxoles y fabes.
El dueñu, d'una yá nun curtia edá, pasa la mayor parte del añu atendiendo'l so prediu: cavando, abonando, sallando, semando, arriandando, llimpiando, desaverando, llantando, regando, atendiendo, atropando, coyendo. Pa nós, los que caleyamos pela rodiada con frecuencia, ye como si llevare ellí dende siempre, como si pasare ellí les venticuatro hores del día. Y eso que la so persona, como diría Dámaso Alonso, «se inclina, / va curvada como un signo de interrogación, / con la espina dorsal arqueada / sobre el suelo». Pero, pesie a too, añu tres añu, estación tres estación, el paisanu continúa la so llucha por trasformar la naturaleza: impedila vencer, primero; adomala, dempués; sometela más tarde a la voluntá del home; facela, finalmente, floriar, espolletar, fructificar, hasta que los minerales, l'agua y la llume españen nuna algarabía de formes, de colores y olores que, pa lo cabero, han tresformase en sabores y alimentos.
Ignoro si'l mio almiráu güertanu pon en práctica aquella prescripción moral de Voltaire en Cándido (trasuntu, dotramiente, de la virxiliana querencia poles pequeñes caseríes), «Cultiva la to llosina», que sería, d'un llau, la única fonte confiatible de la nuestra felicidá y, d'otru, lo máximo que podríamos facer, tanto nel sentíu material como moral, por meyorar el mundu, lo que nun diba ser poco, por cierto; o si, d'otra miente, failo solo como un imperativu cultural que deprendiera d'atrás o como una volición afaladora del so propiu impulsu personal. Probablemente, un poco de too.
Lo que sí sé ye que cuando esti home lo dexe -porque nun pueda más o porque la vida ya nun-y conceda más plazu nesta tierra, qu'oxalá sea mui tarde-, seguramente la güerta desaparecerá y nel so llugar habrá, primero, un bardial, dempués, un xardín o asfaltu.
Del so pasu y llabor quedaránnos, a los que frecuentamos y gociamos la so tan reiterada obra, imáxenes del acompasase de la llosa coles époques del añu mentantu él la trabayaba; memories de colores y olores arreyaos a la lluz o a les ñubes; la gayola de la primavera avanzada españando en verdes; la tristura de la tierra erma nos iviernos; el so fotograma llaborando, y, sobre tou, la figuración de la so persona como «eidos», como estampa exemplar del acontecer humanu: esi enfotu constante pa domar y camudar la naturaleza ensin llogralo de forma más que provisional; esi empeñu en construir pa los descendientes un mundu que seguramente los descendientes nun van valorar nin querer; esa volición testona por dexar escatafinos del nuestru pasu, yá sea nes obres yá sea na memoria de los demás, entá a sabiendes de lo continxente d'esos rastros de la nuestra presencia. Sísifos todos d'un eternu afanosu adovanar que torna mañana al puntu de partida: les nuestres obres, la memoria del nuestru ser, la persona y el nome de caún de nós; el mesmu tiempo y sociedá que nos envuelve, d'un ser tan borrinosu, anque nun lo paeza, como'l de los individuos.
Como decía el Señor de la Torre de Juan Abad: «Fue sueño ayer; mañana será tierra»; aunque sea aquí inverso el orden: «Fue tierra ayer; mañana será sueño». Y, en mediu, esa brillante llaparada ente dos nueches prietes que ye l'home, que somos caún de nosotros.
Una güerta situada orielles del ríu Piles (el Piles ye, por ciertu, ún de los topónimos de Xixón que más lluegu apaecen n'antigüedá), probablemente la última güerta que queda «intra muros» de Xixón, esaniciaes va poco dalgunes d'El Coto y esapaecíes cuantayaque les arenoses lloses d'afamaes llechugues de lo que güei ye El Muro.
35 por 25 metros, aproximadamente, con orientación Norte-Sur. Nesti final de marzu, la mayor parte la faza ta en barbechu, ofreciendo a la vista na más el color buxu y negru de la tierra desnudo. Pero yá verdexen dalgunes plantes: una docena repollos, entá en fueyes abiertes; cuatro fileres d'ayos, que van medrando yá; unes cuantes llechugues tienres, amparaes de los páxaros con unes redes; una estaya de les feraces fabes de mayu; una trompaína d'acelgues col so verde brillante, y, pelos bordes, puyos de lo que más tarde van ser berces o repollos d'otres menes. Na vera del extremu norte, flores de delles tribes: caléndules, narcisos, margarites, y, n'espera d'españar en color y n'olor, los blancos jazmines, que dientru d'un mes van enllenar al transeúnte d'un prestosu arrecendor. Ente la grisácea tierra ensin semar tán ya preparaes, como tiendes de campaña, les cuques peles que dempués esguilarán, pioleteando colos sos zarciellos, fréxoles y fabes.
El dueñu, d'una yá nun curtia edá, pasa la mayor parte del añu atendiendo'l so prediu: cavando, abonando, sallando, semando, arriandando, llimpiando, desaverando, llantando, regando, atendiendo, atropando, coyendo. Pa nós, los que caleyamos pela rodiada con frecuencia, ye como si llevare ellí dende siempre, como si pasare ellí les venticuatro hores del día. Y eso que la so persona, como diría Dámaso Alonso, «se inclina, / va curvada como un signo de interrogación, / con la espina dorsal arqueada / sobre el suelo». Pero, pesie a too, añu tres añu, estación tres estación, el paisanu continúa la so llucha por trasformar la naturaleza: impedila vencer, primero; adomala, dempués; sometela más tarde a la voluntá del home; facela, finalmente, floriar, espolletar, fructificar, hasta que los minerales, l'agua y la llume españen nuna algarabía de formes, de colores y olores que, pa lo cabero, han tresformase en sabores y alimentos.
Ignoro si'l mio almiráu güertanu pon en práctica aquella prescripción moral de Voltaire en Cándido (trasuntu, dotramiente, de la virxiliana querencia poles pequeñes caseríes), «Cultiva la to llosina», que sería, d'un llau, la única fonte confiatible de la nuestra felicidá y, d'otru, lo máximo que podríamos facer, tanto nel sentíu material como moral, por meyorar el mundu, lo que nun diba ser poco, por cierto; o si, d'otra miente, failo solo como un imperativu cultural que deprendiera d'atrás o como una volición afaladora del so propiu impulsu personal. Probablemente, un poco de too.
Lo que sí sé ye que cuando esti home lo dexe -porque nun pueda más o porque la vida ya nun-y conceda más plazu nesta tierra, qu'oxalá sea mui tarde-, seguramente la güerta desaparecerá y nel so llugar habrá, primero, un bardial, dempués, un xardín o asfaltu.
Del so pasu y llabor quedaránnos, a los que frecuentamos y gociamos la so tan reiterada obra, imáxenes del acompasase de la llosa coles époques del añu mentantu él la trabayaba; memories de colores y olores arreyaos a la lluz o a les ñubes; la gayola de la primavera avanzada españando en verdes; la tristura de la tierra erma nos iviernos; el so fotograma llaborando, y, sobre tou, la figuración de la so persona como «eidos», como estampa exemplar del acontecer humanu: esi enfotu constante pa domar y camudar la naturaleza ensin llogralo de forma más que provisional; esi empeñu en construir pa los descendientes un mundu que seguramente los descendientes nun van valorar nin querer; esa volición testona por dexar escatafinos del nuestru pasu, yá sea nes obres yá sea na memoria de los demás, entá a sabiendes de lo continxente d'esos rastros de la nuestra presencia. Sísifos todos d'un eternu afanosu adovanar que torna mañana al puntu de partida: les nuestres obres, la memoria del nuestru ser, la persona y el nome de caún de nós; el mesmu tiempo y sociedá que nos envuelve, d'un ser tan borrinosu, anque nun lo paeza, como'l de los individuos.
Como decía el Señor de la Torre de Juan Abad: «Fue sueño ayer; mañana será tierra»; aunque sea aquí inverso el orden: «Fue tierra ayer; mañana será sueño». Y, en mediu, esa brillante llaparada ente dos nueches prietes que ye l'home, que somos caún de nosotros.
Nota: asoleyóse en la Nueva España del 31/03/10
3 comentarios:
Por ahí gústayos munchu caleyar a mi madre y el mi hermanu. Ta ella enamorada de esa güerta. Ta que se llambe por garrar la fesoria y ayudar al paisano. Un saludu Xuan
Munches vegaes desvíome al pasar pela zona, pamidea fales d'una güertuca asitiada en Fontanía (La Guía), ente l'IES Piles y el taller de cerámica. Munches vegaes ta'l paisanu, la muyer, o dambos dos, dándo-y a la fesoria, quitando maleza, etc. La verdá que presta y ye una suerte vivir nuna ciudá na que tovía se pueden atopar sorpresines asina.
Y escribo esto mientres veo a mio pá pelease a fesoriazos nel güertucu de 2x2 que tien na parte d'atrás de la casa hehe, pero que nun tien nin la mitá de romanticismu y valir que la que cites.
un saludu candial
Publicar un comentario