Topen n'Armenia el llagar de vinu y ritu más antigu del mundu

N'Armenia acaba de descubrise la collecha vinu más antigua qu'hasta agora conocemos, una añada d'unos 6.000 años d'antigüedá, no qu'agora ye'l sur d'Armenia, na villa d'Areni.

La escavación permite camentar la imaxe d'una sociedá complexa, na que los asistentes a un intierru tomaben vinu -hai que suponer que como ritual- d'una mayada especial, fecha nun cementeriu allugáu nuna cueva.

La datación por carbonu amosó que la uva -atopóse una uva deshidratada cerque d'un llagar de vinu- cultivóse hacia el 4.000 a.C.

Pero nun m'interesa únicamente señalar esto, sinón señalar la importancia de la técnica y el comerciu pal avance de la civilización y la meyora les condiciones de la vida humana.

Asina, por exemplu, l'espoxigue de la civilización de Hallstatt dibióse a un llarguísimu períodu d'esplotación y esportación del sal a otres zones d'Europa. Esi comerciu, y polo tanto l'emplegu masivu del sal n'otros llugares, permitió una conservación más fácil de la carne, un meyor almacenamientu y una más amplia distribución, y, darréu, arreyó una disminución del afamiamientu y una meyora de les condiciones nutritives.

Asina, entós, dende los primeros momentos de la nuestra hestoria, dende "la prehestoria", el comerciu y los inventos -l'espíritu investigador y esplorador, l'afán aventureru y el pruyimientu de ganancies- como motor de la hestoria y del progresu humanu.