Blanco inaugura un puertu casi en blanco (II)

Pero los problemes d'El Musel nun terminen col del impactu visual sobre la costa y les sos consecuencies estétiques y económiques nel sector terciariu. Van muncho más allá.

En primer llugar, ta la cuestión de la financiación: dempués d'una contratación y una xestión económica discutible (con un 40% de suba nos costes) y poco creíble nes desplicaciones que se dieren, el puertu nun consiguió nin financiación de la UE nin del Gobiernu Español, colo que tuvo qu'acudir a un créditu de 215 millones d'euros, que, ñidiamente, va tener la so repercusión financiera a mediu y curtiu plazu, y, polo tanto, sobre la competitivá del puertu.

Per otru llau, les infraestructures necesaries pa complementar los tránsitos hacia'l puertu y la so zona loxística nun tan resueltes y van tardar años en talo. Referímonos tanto a la ZALIA como a l'autovía de serviciu per Aboño.

Pero esos nun son, con too y con ello, los aspectos más graves de la cuestión, sinón la falta tráficos y ocupación del puertu, cuestión que ye un gravísimu problema dende fai tiempu y que, dende llueu, en ningún casu van resolver los actuales rectores, auténtiques llaceries que lleven décades ensin conseguir meyorar o aumentar los tráficos del puertu.

Per otru llau, y además de la competencia de les infraestructura portuarias vecines, hai que señalar qu'un puertu, de per sí, nun ye una infraestructura qu'afale'l movimientu económicu, sinón que lu facilita y lu amena si la zona a la qu'atiende tien un vivu crecimientu económicu per se. Y esi, ñidiamente, nun ye'l casu d'Asturies.

D'esi mou y manera, lo que don José Blanco vieno a facer l'otru día nun fue nin entamar una solución nin a concluir un proyectu, sinón, cenciellamente, a poner un puntu intermediu (y a comer, supongo, de pasu, bones fabes y morcielles) nun problema que nun parez que vayan solucionar los que taben llamaos a ello.

Pa ver la propaganda que los socialistes ficieron a cuenta los nuestros impuestos y les deldes que vamos pagar colos nuestros impuestos, asina como pa ver les mentires que contaren sobre estos cinco años d'obra y los anteriores de proyectos y tramitación, pueden pinchar EQUÍ