Un escándalu xudicial: la puesta en llibertá de dos secuestradores

Armes de los "presuntos". Semeya proporcionada pol C.N. de Policía

El que lleera los medios esti fin de selmana nun dexaría de tener un surtíu: dos persones que secuestraren a otra, que lu amenazaren de muerte y que, dempués de soltalu, amenazárenlu con matar a la familia si nun-yos daba un dineru, quedaben en llibertá (con cargos, eso sí) tres prestar declaración delantre'l xulgáu (esto ye, delantre'l xuez correspondiente). En poder de los secuestradores atopárense, per otru llau, armes de fueu (ente otres, un subfusil), silenciadores, munición y otres arabíes destinaes al delitu y la violencia.

Al lleer aquello, como digo, al ciudadanu dába-y una fonda revoltura de tripes y un xirpíu: ellí había daqué que fallaba, o'l xuez o la fiscalía o lo que fuese. Y entamaba a pensar si'l xuez nun sería d'aquellos benditos que piensen que nun hai delincuentes, si non que sólo hai víctimes de la sociedá.

Agora, al día siguiente, los delincuentes (presumibles, por supuestu) nun se presentaren al xulgáu, como lo teníen mandao y diérense a la fuga. Y ún entama a entrugase coses: dende la falta de chapeta a otres de más gravedá.

Agora toos cuerren a dar desplicaciones de por qué´l xuez nun metió en prisión a los (presumibles, por supuestu) raptores "coleccionistes" de pistoles. Y desplica'l fiscal que la culpa nun ye d'él, y la policía ta que la lleven los diaños, y el Delegáu del Gobiernu diz que "respeta les decisiones xudiciales", y el TSJA cuerre a dar desplicaciones de por qué nun hubo prisión provisional, y...

Bono, pues ún espera que, sobre coyer pronto a los (presumibles) delincuentes, el Conseyu Xeneral del Poder Xudicial abra una investigación y, nel so casu, depure responsabilidaes.

(Y, per otru llau, nun puede dexar de comparar la decisión xudicial cola prisión de Marta Renedo Avilés, José Luis Iglesias Riopedre y María Jesús Otero. Y entá suponiendo que los tres sean culpables de tolo que suponemos que se-yos supón y muncho más, nun entiende que pa delitos non violentos se imponga y caltenga la prisión ensin fianza y pa que'l que secuestra, amenaza de muerte y tien pistoles y fusiles s'imponga la llibertá con cargos.

Y, si facemos comparanza colo que-y pasaría al que llevase encima tres vasos de vino conduciendo, o al que dixera una muyer que la amenazara, ¡qué quieren que-yos diga!)

Y équí nun son solo los xueces o los fiscales los que fallen, son los diputaos votaos pol pueblu los que faen les lleis en virtú de los grupos de presión que los emburrien, de los medios de comunicación que-yos dicen lo que tienen que facer o de les modes. Esto ye, son esos tarambanas a los que vustedes voten los que faen eses lleis que permiten tratar meyor al delincuente violentu que al ciudadanu que comete delitos que nun son de sangre, o que son faltes o infracciones alministratives.

Suelo yo decir qu'hai "acéfalos llexislantes", que "llexislen coles témpores" (por decilo fino). Pero non, en realidá colo que llexislen ye colos sos votos, colos de vustedes.

Pues yá lo saben.