El carbayu lliterariu

José Benigno Fernández, "Marcos del Torniello" ye un clásicu de la nuestra lliteratura que produz, fundamentalmente, nel primer terciu del XX.

Anque dalgunos testos d'elli pueden producir dalgunes rocees emocionales o ideolóxiques en munchos llectores de güei, ensin embargu la mayoría la so obra son testos de gran prestosidá: tienen gracia, aciertu descriptivu y espresivu, bayura de lésicu, propiedá llingüística. Marcos del Torniello domina, sobre too, la estampa costumista y l'humor, y, no que cinca a la técnica, la soltura narrativa, l'aciertu descripitivu y, perespecialmente, la gracia del diálogu. Además, na so obra, podemos atopar una importante fonte de documentos hestóricos, sobre sucesos de la época.

Recomendamos lleelu. Ye prestosu e instructivu.

Vamos dar d'elli dellos versos del poema "¡Que reblinquen!", asoleyáu n'Orbayos de la Quintana (1925). Por cierto, nel carril d'esti poema camina años más tarde'l "Sardinera de Xixón", de Matías Conde, que, aparte de tar seguramente afaláu pol de José Benigno ye ún daqué más floxu, tanto en llingua como en gracia.

¡QUE REBLINQUEN!

Con el paxo na cabeza
ye una xana casimente
la graciosa resalada
más simpática del muelle
que apregona les sardines:
«¡Que reblinquen! ¡Hay que veles!...
¡Y qué vives y qué grandes
y qué gordes y qué güenes!»
Ye muy guapa esta rapaza
que por Nieves arrespuende,
morenina, de faiciones
delicades y correches,
pa que axuguen co la estampa
de so cuerpo, que se fiende
con fachenda, con remango,
con salero que se vierte
cuando diz, apregonando:
«¡Quián les quier! ¡Sardines fresques!....
¡Ay qué gordes y qué grandes,
y qué vives y qué güenes!
Son de a tercia, así me salve…
¡Que reblinquen porque pueden!» […]