Pa unes entendederes al dereches.
Un comunicante anónimu dizme, a propósitu del mio ensiertu "¿Merecemos esti gobiernu?":
«puede ser cierto pero esi ye un discursu victimista ... negativu ... quexudumosu ... perdedor. y en politica el que va de victima pierde siempre .. ye lo que hay ...»
Probablemente nun m'espresé bien, probablemente nesi momentu'l comunicante nun fue pa tener bones entendederes. Vamos volver a repetilo:
«Que nos lleven a les cotes más altes de paru de la hestoria de recién, que desprecien l'asturianu y les sos señes d'identidá como si fuesen unes madreñes rotes y enllamuergaes nun folleru, que dexen arruinase los monumentos del arte asturianu (mal llamáu "prerrománicu"), una de les xoyes de la humanidá y testimoniu de la nuestra más alta presencia na hestoria como pueblu? ¿Merecémoslos a dambos, al PSOE y a Areces?
Por supuestu que los merecemos, porque los votamos. Ye más, gústenmos. Porque dempués de tener paladeao la primer vegada les sos fedorientes cualidaes organoléptiques y comprobaes les sos nules cualidaes alimenticies, volvemos a pedir otra y otra ración de lo mesmu. Somos insaciables: enviciaos na puxarra nun podemos vivir ensin ella.»
Asoleyáu por Xuan Xosé Sánchez Vicente el 13.2.09
El refervimientu nun se quexa de lo qu'hai como inevitatible: va empobinao a tanta xente que, siendo responsable d'esti desastre col apurrimientu del so votu una y otra vegada, llueu quéxase del gobiernu, ensin querer reconocer que ye él mesmu, ente otros munchos individuos, el qu'afala y caltién esti estáu de coses.
N'otres palabres: na democracia nun son los dioses o los diaños los que nos manden los castigos, somos nós los que los buscamos, queremos y traemos.
Polo demás, ¡claro que nun tamos entregaos al pesimismu, sinón ¿pa qué díbamos seguir esbrexando por esti pueblu? Pero lluchar por esti pueblu supón, lo primero, afalalu a la concencia y a la responsabilidá de los propios actos, nun da-y la sosiega de la combayonería y l'afalagu de la irresponsabilidá.
No hay comentarios:
Publicar un comentario