Como persaben, la ministra de paños calientes y Fomentu, doña Magdalena Álvarez, ta de viaxe pa Rusia y Siberia. ¿Qué va facer ellí? Anque`l pretestu oficial ye otru, dellos psicólogos sostienen que se trataría de la manifestación d`un impulsu reprimíu: en Siberia doña Magdalena daría satisfación a les xustes pasiones que l`afalen a da-yos el so merecíu a tantu babayu impertinente que, por nun ver pa ser les sos virtudes, anda echando por ella, ensin caer na cuenta del valir de la so demostenesca llapia o del altor delaciervíegu de la so capacidá organizativa nel ámbitu les carreteres o los ferrocarriles; ensin ser p`apreciar la so esactitú de cucú helvéticu a la hora de cumplir col calendariu los sos compromisos.
En tou casu, lo que paez descartao ye que vaiga a Siberia a llevanta-y a Solzehnitzin (Alexander Isayevich) un monumento pola so resistencia al facismu y pola so capacidá d`esixir la llibertá de los demás a costa de la suya, o de predicar la llibertá de pensamiento a costa del gulag. Como la mayoría la izquierda española, doña Magdalena nun ta por facer aponderances de los reaccionarios y compañeros de viaxe de la derecha.
Pero fagámos-y casu a la moza y nun andemos n`interpretaciones: a lo que va ye a enterase de cómo organicen los rusos los transportes (aéreos, ferroviarios) nes estremes condiciones de ñeve y fríu en que suelen movese. ¡Yá ye disculpa estúpida pa facer un viaxe gratis a costa del dinero los ciudadanos! ¡Vaya tortoriu que tien la rapaza! Porque yá me dirán si los ingenieros españoles (y, por supuestu, los de Fomentu) nun saben satamente lo que fain en Rusia (y en Finlandia y en Suecia y n`Islandia y en Canadá, y en…) p`apañase en condiciones climátiques perdures. Y si non lo supiesen, ¿qué ye?, ¿que van deprendelo meyor si los acompaña doña Magdalena pa traducir del rusu y pa desplicalo? ¿Acasu nun van poder ponelo en práctica si nun s`entera doña Magdalena? ¿O ye que ye doña Magdalena la que va arremangase y diseñar ella y executar personalmente los planes p`aeropuertos, ferrocarriles y carreteres? Lo dichu, ¡vaya pretestu más bobu (y más insultante pa los inxenieros) pa dase un viaxe turísticu a costa la corexa los ciudadanos n`época de catástrofe económica!
Anque, too ello ye tan raro y tan descarao, que ¿nun será más razonable pensar na satisfación de los impulsos reprimíos (pero inxamás estrapallaos dafechamente)?
Como diz el cantar. ¡Válame la Magdalena! ¡La Magdalena me vala!
O meyor:
¡Válame la Madalena!
¡Pa saber barrer la casa
dir deprender a Siberia!
1 comentario:
La madalena a falta de palabra y puntualidad a la hora de cumplir sus compromisos tiene gracejo y desparpajo.
Es lo que tiene, porque no tiene mas y ya se sabe que en este país cualquiera con un poco de audacia puede llegar a ministro y sino que se lo pregunten a Godoy o a Bermejo.
Publicar un comentario