De coríos y celebraciones pola llingua

Dos biltos de dos ensiertos anímenme a sendes coses: l'ún a una precisión, l'otru a una recordatoriu.

La precisión ye sobre el biltu al ensiertu del 10/11, a propósitu la coriada d'El Piles. Lo primero, agradece-y el guañu, coles sos anotaciones, al biltador. Ye verdá que tanto'l cortexu como'l guariar y el criar danse fundamentalmente na primavera. Pero pa lo que valga: nun fai más d'un mes o mes y mediu andaba una coría con 8 (satamente 8) coriinos. Estraño pero ye ansina. Per otra parte, la selmana pasada un coríu de los que tienen les plumes con más collor y el piscuezu ente verde y azul andaba enriba un coríu d'esos que son ná más que marrones, xingaba les esñales y mordíalu na parte enriba'l piscuezu. Cuando se quitó el d'enriba, el coríu marrón d'embaxu entamó mover les ales y facía como que llavaba les sos "partes". Fai, repito, solo una selmana.

El recordatoriu ye a propósitu del guañu al ensiertu sobre la clase que güei, 13, diba dar na Escandalera la Xunta pola Defensa de la Llingua. Invítame'l comunicante a recordar celebraciones. Pues, a propósitu la llingua, recuerdo dos, con muncha gayola. La primer, cuando propunxe y conseguí l'artículu cuartu l'Estatutu, que d'aquella taba yo nel PSOE, que lu propuse yo pola mio cuenta y consiguióse gracies a ello. Ye verdá que nun lo celebré tanto cuando en Madrid PSOE, UCD, IU y AP caparen la parte'l testu que decía "como lengua específica de Asturies".

La segunda celebración fexímosla -el PAS- cuando, dempués de munchu esbrexar, delidiar y solliviar conseguimos l'aprobación de la Llei d'Usu y Promoción. Alcuérdome que, mentantu lo celebrábemos con una espicha nel restaurante Los Monumentos, nel Narancu, la tropiella corría detrás de los que los engañaben prometiendo-yos una oficialidá que yá sabíen que nun diben conseguir nin taben dispuestos a conseguir. Pero, eso sí, baillaben detrás de la gaita y el tambor, mientres glayaben "viva la bagatela", que-yos paecía muncho más guapo y amoriador.