El sector de las nueves tecnoloxíes espoxigó fuertemente nos últimos años n'Asturies, y algamó les 600 empreses y los 5.500 puestos de trabayu. L'alministración ye ún de los sos principales clientes de les tecnolóxiques asturianes. La so cuota de mercáu aporta al 22%.
Esto díes, les empreses tecnolóxiques anden llegando a alcuerdos pa conseguir contratos en Latinoamérica, África y Europa del Este. Ye esa un bona noticia: de mano porque, según llevamos diciendo dende fai más de venti años -y non de recién, como dalgunos-, el meyor camín (casi l'únicu) pal crecimientu y la creación d'empléu ye la salida a los mercaos esteriores; en segundu llugar, porque esa, la del crecimientu, ye la única forma d'algamar recursos técnicos y capitales p'algamar recursos nun sector onde la obsolescencia ye tan alta. Finalmente, porque ye tamién bona esa alianza ente empreses, que favorez a toes nel ámbitu esportador y nel investigador. Si quier más información pueden ver l'artículu de la Nueva España pinchando equí 
1 comentario:
Ye verdá Xuan, a priori ye una bona noticia. Pero los que tamos nesti sector de les TIC podríemos cuntate la cara-B del mesmu. Y ye que, d'un llau, ye un sector asistíu dafechu. Nel momentu nel que l'alministración pública quite'l goteru, el sector TIC asturianu va fundir irremediablemente. Con too, esto en si mesmo, nun tien porque ser malo.
Pero lo que sí ye criticable, y muncho, ye que el sector funciona en bona midida como otros munchos sectores nesti país. Eses perres publiques siempre van a les mesmes empreses (¿quién ta faciendo la web del Ayuntamientu de Xixón?) y eses empreses tan afitando un modelu llaboral mui asemeyáu, por exemplo, al del periodismu n'Asturies. La mayoría los sueldos son de 800€ y les empreses, aconceyaes en cierta asociación, impiden la movilidá llaboral (en plan mafia), cortando dafechu les posibilidaes de espoxigue profesional de los trabayadores.
En resume, munches perres pa unos pocos (amiguinos del rexime del PSOE) y los bonos profesionales y la xente más cualificao a ganar los cuartos fuera d'Asturies (porque equí un xefe d'equipu/proyectu anda pelos 1000€ al mes, fuera igual gana 4 o 5 veces más).
Ye un tema bien interesante Xuan, aconséyote qu'atropes más puntos de vista.
Un saludu
Publicar un comentario