El carbayu lliterariu

Toi lleendo al mesmu tiempu dos poemarios, Robinson Asur, d`Elías Veiga y Les vides incompletes, de Xandru Fernández. Interesantes dambos, apunto que la escritura de Fernández paezme más ellaborada y trabayada, mientres que la d`Elías Veiga paezme más directa y espontánea.
Dotramiente l`estilu de Fernández tien períodos más llargos y versu de más llonxitú, escontra`l de Veiga, que tien a tener frases más curties y versos de menos llargor.

Doi equí unos versos d`un de los poemes de Xandru Fernández:

Que debiera tar contentu por vivir nun país onde nun
vas a la cárcel por escribir un poema qu'a dalguién
nun despachu-y suene impíu o
antipatrióticu.
Y alegróme d'ello, ye verdá: naide nun va a la cárcel, equí,
por alterar l'orde públicu con versos o canciones. Lo que
pasa, y perdona,
perdonái que me ponga repunante, ye
qu'igual esti ideal del poeta palestinu o del
poeta chinu o del
poeta guineanu
ye sólo una ximuestra de lo qu'ellos suañen a la sombra
de les muries de la cárcel.
La non represalia, equí, ye resultante d'una fonda
indiferencia y un control blindáu de les pasiones, de los vezos,
de los xeitos de cantar y les canales peles que viaxa la
pallabra, cuando viaxa acullá d'una edición limitada a un
puñáu d'incondicionales que pa enriba, na so condición de
happy few, siempre-y busquen los cinco pies al gatu. Claro que
prefiero eso mil veces a un tiru na vidaya.
Lo qu'en veres m'espanta
ye tantu espantu por nada, o si non dime,
dicíime: los qu'equí tanto sufrieron ¿yera esta
la xusta recompensa a los sos sufrimientos?
Si hai que morrer por nada
¿compensará saber que la poesía
ye esa nada que sólo interesa a los poetes
y a los perros de presa de dellos dictadores?