Más sobre l'Estatutu

Dende'l puntu de vista de la "realidá de los partíos políticos" l'Estatutu nun ye más qu'un termómetru de coyuntura. L'atención que-y dean vien en función de la utilidá que pa otres realidades esternes a Asturies-yos pueda prestar como instrumentu d'afalamientu y ximielgamientu de les respectives parroquies de fieles (y de la rodiada les mesmes, pa ser esactos).

Dende'l puntu de vista de la xeneralidá de los ciudadanos asturianos (conscientes d'ello o non) l'Estatutu val por otres "realidaes instrumentales":

• La de la dignidá y la igualdá política nel conxuntu d'España (apreciada o non).


• La de la "capacidá" (cosoberanía) pa facer coses na propia realidá y pa empobinala nún o n'otru sentíu, aprovechada o non.


• Y, en términos identitarios y sociales, p'acabar de normalizar la cuestión llingüística y otres, aquélla mediante la cooficialidá. (Cabe, como se sabe, empeorar les coses: tala ye la redacción que tienen pactada nestos momentos PSOE (y, por implicación, IU) y PP).

La pregunta que nos podemos facer agora ye esta: Na prósima revisión estatutaria (verosímilmente, la prósima llexislatura, masque sea a finales y de mala gana) va haber modificación estatutaria, nesi casu ¿habrá ellí una fuerza (y fuerza, fuerza, non un solu diputáu o dos) que defenda de verdá los intereses asturianos o nun habrá dala? Seguiremos los asturianos sometíos al engañu d'IU y al estrapallamientu, embabiecamientu y enquillotramientu de PSOE, PP y IU?

Si vustedes faen cruzase apuestes, la posibilidá d'esta última opción seguro que se paga mui alta, y la d'una fuerza que defenda de verdá los intereses asturianos, perbaxa. Nun digo a cómo porque me salen los collores a la cara (póngome como una mazana "del llau que-y da'l sol", que diz el canciu).

¿Va ser asina, según dicen les apuestes o non? Yo pola mio parte, y lo que yo represento, vamos facer tolo que tea na nuestra mano pa que fracasen les predicciones (racionales). ¿Vamos ser pa ello?

A los asturianos, en xeneral, digo, y a dalgunos en particular.