La Talá. Llanes.

El planeamientu urbanísticu de Llanes ye una de les cuestiones más escandalosamente mal feches de los últimos tiempos n’Asturies. Efectivamente, escontra les decisiones del gobiernu llaniscu vienen manifestándose reiteradamente grupos concretos de ciudadanos del conceyu, pero la cuestión nun ye solo un discutiniu ente intereses concretos o puntos de vista diverxentes: ye, sobre tou, el fallu nos xulgaos escontra les decisiones del Ayuntamientu.

La selmana pasada, en concretu, teníamos noticia de que’l Tribunal Superior de Xusticia d’Asturies anulaba’l llamáu Plan de la Talá, un de los más escandalosos y protestaos proyectos del urbanismu llaniscu. Na medía que’l plan yera un proyectu emblemáticu pala corporación socialista y que nél asitiaben parte de la exemplaridá del so trabayu en xeres urbanístiques, la sentencia constituye un bon cibiellazu, tanto porque rechaza’l Plan como porque vien a dar la razón a los opositores (oposición ciudadana, na so mayoría), al tiempu que los va afalar nel so trabayu de contestación. Bien pol TSXA y pol trabayu continuáu de los vecinos.