Cercu al alcalde asturianista de Ponga (y a los vecinos)

El fiscal de mediu ambiente acaba de facer público que va pedir tres años y mediu de cárcel pal alcalde de Ponga, Cándido Vega, por abrir pistes ganaderes en monte, «ensin permisu mediuambiental» a lo que paez. Al marxen de les discusiones de formalidá llegal, hai que señalar lo que d’inhumanu y antidemocráticu tien el fondu la cuestión, que ye ésti: La política llamada «progresista», la del PSOE e IU, fundamentalmente, anque non solo, consiste n’espulsar del so hábitat de más de dos mil años (sí, más de dos mil años) a los asturianos pa dexa-y sitiu a les cotolles, a les cotolles. Repito, a les cotolles, nin siquier a los llobos.

Porque lo que ta consiguiendo esa política de parques y de falsa protección de la naturaleza ye char a los paisanos del monte de l’actividá agraria, col únicu fin de conseguir unos pocos cientos de votos de señoritos les ciudaes y de quedar bien los autodenomaos «progresistes» cola idea que de sí mesmos tienen.

Convién recordalo: les pistes en cuestión son pistes ganaderes que siempre esistieren, lo que se fizo fue adecuales pa que los pocos paisanos y pastores que queden puedan subir y baxar al monte con más facilidá –y ensin matase- a atender el so ganáu.

Pero, claro, na política «progresista» del PSOE y IU lo importante nun son les persones, nin los ganaderos, nin mucho menos los asturianos, sinón los metros cuadraos que puedan proclamar en Madrid que declararen «parque» o «reserva».

Dempués, que intervenga un fiscal en defensa les cotolles ya ye cosa que vien de por sí.