Na memoria de Tomás Noval y tolos mineros acebacheros que lu precedieren.
Tamos avezaos nos últimos tiempos a ver la hestoria y la sociedá como un productu remanecíu fundamentalmente de les componentes colectives de la actuación humana. Esa percepción y esi discursu perrefuércense n´Asturies con dalgunos elementos particulares de la nuestra hestoria nes últimes dómines: les güelgues xeneralizaes, la llucha obrera, la resistencia a aceptar los nuevos tiempos (convertíes estes dos estayes n´épica cinematográfica ocasionalmente), los españíos de llocura, destrucción y suidiciu colectivos de la década de los años trenta nel sieglu pasáu, etc. Ensin embargu, puede qu´esa nun tenga sío nin la faza más poderosa na conformación de la nuestra sociedá nin la más importante na definición de la nuestra identidá, sinón que lo tenga sío otra: la componente individual, la de l´absoluta soledá y voluntá de la persona al enfrentase al mundu de la naturaleza y construir dende él el mundu social.
Viénenme estes consideraciones al refervimientu a propósitu de la muerte´l 9 d´agostu, a los 86 años, de Tomás Noval, vecín d´Oles y caberu acebacheru d´Asturies. Tomás Noval, al que yo viera y almirara en dellos reportaxes televisivos, fue, al mesmu tiempu, un continuador de la tradición y un inventor d´una actividá que constituyó un mundu esclusivu d´elli. Continuador, na midía na que trabayó na estracción d´acebache, una xera de llarguísima duración temporal ente nós, la cuala supuso, fai sieglos, un importante vector económicu nel nuestru país. Pero, al mesmu tiempu, derrompió un mundu nuevu pa él, al empezar, nel 1938, a reabrir y reaprovechar les escombreres y galeríes de la marina de Quintes, desayaque abandonaes. Al empar, él entraba solu, ensin dala compañía, n´aquelles galeríes antigües, cola sola gabita del so candil o llinterna y la so decisión.
Esi espíritu qu´amesta enfotu p´abrir nel mundu un nuevu sucu y enfrentase al mesmu en soledá y con empeñu ye una componente hestórica de la nuestra cultura, que va arreyada, en parte, a delles xeres y que, per otru llau, constituye l´aniciu d´una concepción del mundu que cuaya en productos culturales oxetivos y que se tresmite al restu la sociedá. Quiero pensar que yera esi mesmu espíritu´l qu´animaba a los mineros prehestóricos que nel Aramu buscaben la mena del cobre, coles pales de los cérvidos a mou y manera de picos. Ye, ensin dulda, el que salendaba y salienda nel solitariu oficiu de pastor nes mayaes y puertos. Ye esi mesmu´l que llevantó los «teitos» —metonimia na que se visualiza l´acción del home sobre la naturaleza y el so enfrentamientu a ella—, el que dio cola palabra «señardá» (del llatín «singularitatem», “singularidá”, “soledá del solu”), cola que se plasma´l sentimientu d´estrañamientu de quien nun tien más compañía que los recuerdos. Él tamién el qu´afayó la tonada y dalgunos de los meyores exemplos d´esti xéneru musical asturianu, como aquel qu´entama «L´aire m´apagó la vela».
El pasáu 17 d´agostu tocábame el prestosu honor de presentar, al pie de los muros de San Antolín de Bedón, el númeru 10 de la revista Bedoniana. Ente otres coses, señalaba yo cómo la continuidá d´esa iniciativa de tanta calidá y talamente singular representa un doble exemplu d´esa componente individual de la hestoria asturiana. Obviamente, per un llau, la que significa la propia revista, empeñada, de dalguna manera, en poner en práctica aquel enfotu del personaxe del padre pasadín de la bueriana El tragaluz, el cualu, recortando caúna de les figures humanes de les semeyes que cayíen na so mano, pretendía, como si fuere Dios, rescatar a toos y caún de nosotros y salvalu pa siempre. Asina Bedoniana, empeñada en salvar la memoria de cada una de les persones y les families de San Martín y Naves.
Pero tamién, dende´l puntu de vista de los empobinadores —Mundo y les demás persones de l´asociación de vecinos naviza, asina como Canco Villaverde, en cuantes promotor intelectual—, la doble voluntá de facer oyíos sordos a les inevitables y omnipresentes crítiques de los prósimos (de la triba d’«esos, ¿qué quedrán?», «Sí, sí, cuando siguen tanto tiempu, daqué habrá» y otres d´esa frasca) y, sobre tou — nestos tiempos nos que los partíos mayoritarios quieren controlalo too y presionen hora tres hora dende l´alministración pa que nada escape al so dictáu, o pa que desapaeza, de nun poder controlase—, la de caltener, escontra la voraz voluntá de fagocitación de la política, el proyectu y caltenese ellos mesmos.
Y non de cualquier manera, sinón con una xera onde ye cada día mayor la calidá de los frutos y más visible l´amor puestu nesa empresa que sigue navegando airosa escontra vientu y marea. Gracies a la voluntá individual d´unos escelentes pocos.
P.S. Como-yos lo cuento: 20 d´agostu, miércoles, 21,25 hores. Un camareru intenta comunicase, nun restaurante a la vera de la mar, con una pareya d´estranxeros, que-y entruga qué ye una «nécora», que pon la carta del establecimientu. Dempués de dellos actos fallidos, el trabayador desplázase a un requexu del llocal, mete la mano nel acuariu y lleva´l decápodu hasta la mesa la pareya. ¡Ah!, «andarrica», diz la fema inglesa.
Asturies n´estáu puru. Asina somos.
Tamos avezaos nos últimos tiempos a ver la hestoria y la sociedá como un productu remanecíu fundamentalmente de les componentes colectives de la actuación humana. Esa percepción y esi discursu perrefuércense n´Asturies con dalgunos elementos particulares de la nuestra hestoria nes últimes dómines: les güelgues xeneralizaes, la llucha obrera, la resistencia a aceptar los nuevos tiempos (convertíes estes dos estayes n´épica cinematográfica ocasionalmente), los españíos de llocura, destrucción y suidiciu colectivos de la década de los años trenta nel sieglu pasáu, etc. Ensin embargu, puede qu´esa nun tenga sío nin la faza más poderosa na conformación de la nuestra sociedá nin la más importante na definición de la nuestra identidá, sinón que lo tenga sío otra: la componente individual, la de l´absoluta soledá y voluntá de la persona al enfrentase al mundu de la naturaleza y construir dende él el mundu social.Viénenme estes consideraciones al refervimientu a propósitu de la muerte´l 9 d´agostu, a los 86 años, de Tomás Noval, vecín d´Oles y caberu acebacheru d´Asturies. Tomás Noval, al que yo viera y almirara en dellos reportaxes televisivos, fue, al mesmu tiempu, un continuador de la tradición y un inventor d´una actividá que constituyó un mundu esclusivu d´elli. Continuador, na midía na que trabayó na estracción d´acebache, una xera de llarguísima duración temporal ente nós, la cuala supuso, fai sieglos, un importante vector económicu nel nuestru país. Pero, al mesmu tiempu, derrompió un mundu nuevu pa él, al empezar, nel 1938, a reabrir y reaprovechar les escombreres y galeríes de la marina de Quintes, desayaque abandonaes. Al empar, él entraba solu, ensin dala compañía, n´aquelles galeríes antigües, cola sola gabita del so candil o llinterna y la so decisión.
Esi espíritu qu´amesta enfotu p´abrir nel mundu un nuevu sucu y enfrentase al mesmu en soledá y con empeñu ye una componente hestórica de la nuestra cultura, que va arreyada, en parte, a delles xeres y que, per otru llau, constituye l´aniciu d´una concepción del mundu que cuaya en productos culturales oxetivos y que se tresmite al restu la sociedá. Quiero pensar que yera esi mesmu espíritu´l qu´animaba a los mineros prehestóricos que nel Aramu buscaben la mena del cobre, coles pales de los cérvidos a mou y manera de picos. Ye, ensin dulda, el que salendaba y salienda nel solitariu oficiu de pastor nes mayaes y puertos. Ye esi mesmu´l que llevantó los «teitos» —metonimia na que se visualiza l´acción del home sobre la naturaleza y el so enfrentamientu a ella—, el que dio cola palabra «señardá» (del llatín «singularitatem», “singularidá”, “soledá del solu”), cola que se plasma´l sentimientu d´estrañamientu de quien nun tien más compañía que los recuerdos. Él tamién el qu´afayó la tonada y dalgunos de los meyores exemplos d´esti xéneru musical asturianu, como aquel qu´entama «L´aire m´apagó la vela».
El pasáu 17 d´agostu tocábame el prestosu honor de presentar, al pie de los muros de San Antolín de Bedón, el númeru 10 de la revista Bedoniana. Ente otres coses, señalaba yo cómo la continuidá d´esa iniciativa de tanta calidá y talamente singular representa un doble exemplu d´esa componente individual de la hestoria asturiana. Obviamente, per un llau, la que significa la propia revista, empeñada, de dalguna manera, en poner en práctica aquel enfotu del personaxe del padre pasadín de la bueriana El tragaluz, el cualu, recortando caúna de les figures humanes de les semeyes que cayíen na so mano, pretendía, como si fuere Dios, rescatar a toos y caún de nosotros y salvalu pa siempre. Asina Bedoniana, empeñada en salvar la memoria de cada una de les persones y les families de San Martín y Naves.
Pero tamién, dende´l puntu de vista de los empobinadores —Mundo y les demás persones de l´asociación de vecinos naviza, asina como Canco Villaverde, en cuantes promotor intelectual—, la doble voluntá de facer oyíos sordos a les inevitables y omnipresentes crítiques de los prósimos (de la triba d’«esos, ¿qué quedrán?», «Sí, sí, cuando siguen tanto tiempu, daqué habrá» y otres d´esa frasca) y, sobre tou — nestos tiempos nos que los partíos mayoritarios quieren controlalo too y presionen hora tres hora dende l´alministración pa que nada escape al so dictáu, o pa que desapaeza, de nun poder controlase—, la de caltener, escontra la voraz voluntá de fagocitación de la política, el proyectu y caltenese ellos mesmos.
Y non de cualquier manera, sinón con una xera onde ye cada día mayor la calidá de los frutos y más visible l´amor puestu nesa empresa que sigue navegando airosa escontra vientu y marea. Gracies a la voluntá individual d´unos escelentes pocos.
P.S. Como-yos lo cuento: 20 d´agostu, miércoles, 21,25 hores. Un camareru intenta comunicase, nun restaurante a la vera de la mar, con una pareya d´estranxeros, que-y entruga qué ye una «nécora», que pon la carta del establecimientu. Dempués de dellos actos fallidos, el trabayador desplázase a un requexu del llocal, mete la mano nel acuariu y lleva´l decápodu hasta la mesa la pareya. ¡Ah!, «andarrica», diz la fema inglesa.
Asturies n´estáu puru. Asina somos.
No hay comentarios:
Publicar un comentario