Doña Rosa "comprenderá"

Doña Ana Rosa Migoya, ministra del Gobiernu Areces, piensa que los funcionarios "comprenden" que se-yos baxe'l sueldu.

Doña Ana Rosa "comprenderá" qu'a los funcionarios nun-yos guste que, además de quita-yos perres del bolsu, los tengan por fatos o por simplayos.

Doña Ana Rosa "comprenderá" que, cuando se sienten declaraciones como les d'ella, los funcionarios se tengan por "cornudos y apaleaos" y que-yos paeza que los ven talo como diz el refrán que, "pa enriba putes tienen que poner la cama".

Doña Ana Rosa "comprenderá" que los funcionarios -asina, en xeneral, que, en particular, hai dalgunos a los "que-yos va la marcha"- tengan un pésimu conceptu d'ella, del so partíu, del so Gobiernu y de la FSA, que pasaren siete años presumiendo de qu'ellos nun conxelaben el sueldu los funcionarios y que, entovía un mes antes de recortalu, aseguraben que dibe subilu perriba l'IPC.

Doña Ana Rosa "comprenderá" que los funcionarios tengan un pésimu conceptu d'un partíu políticu que comió y marafundió'l país durante siete años, y que-yos lo fai pagar agora a ellos y a los pensionistes.

Doña Ana Rosa "comprenderá" que los funcionarios tengan el mismu pésimu conceptu de los sos palafreneros habituales, IU, que tamién prometió que diba tar en contra los recortes y, dempués, como siempre, apuntóse a ellos en mediu d'un bla, bla, bla.