Carretera Sotu'l Barcu-Pravia

Ente les coses de les que nesta vida toi satisfechu o medianamente satisfechu ye de les munches coses que fecimos nel PAS y, especialmente, de la nuestra capacidá pa ver la realidá y el mundu modernu y, en consecuencia, adelantanos pa proponer coses o dar soluciones.

Por exemplu, entamamos a reclamar fai más de trenta años una Televisión Asturiana. Llegó tarde y mal y perdiérense munches oportunidaes industriales y económiques por nun facela a tiempu. Otru: fai más de diez años (¡diez años!) que llevamos nel nuestru programa la esixencia de que Europa punxere en marcha un programa común pa fomentar la industria del coche llétricu. Empieza a llegase a ello, pero non corriendo, zapicando. L'últimu, ná más (y xuro que son munches docenes): pasamos venti años pidiendo allumar l'autopista, entama facese agora gotina a gotina.

Pues bien, en términos menores hai que recordar que yá fai más d'un añu llevamos esixendo la igua de la carretera de Sotu'l Barcu a Pravia. Agora (cito de La Nueva España del 21/01/2010) "Trescientos usuarios de la carretera entre Soto y Pravia exigen su mejora en Facebook".

Préstamos esi movimientu ciudadanu, pero prestaríamos abondo más que les alministraciones y el Gobiernu ficiesen daqué curiosu y en plazu.

Si quieren ver aquel comunicáu pueden velo en la WEB d'UNIÓN ASTURIANISTA URAS-PAS.

Y, si quieren ver la carretera aperiada y, nel futuru, les sos demandes atendíes y les sos necesidaes satisfeches, péguen-yos una patada a estos rapazos nel traseru la urna: son unos absolutos inútiles, ente otres coses, porque creen que, fagan lo que fagan, una bona porrada d'asturianos van seguir poniendo l'enfotu n'ellos.