Aznar y les autonomíes

El pasáu día 15, en Lleón, el expresidente Aznar tuvo una intervención na qu'amosó la so preocupación polos problemes económicos y políticos d'España. Y, ente otres coses, vieno decir que l'Estáu de les autonomíes, talu como ye güei, nun ye viatible, darréu que el Gobiernu central «es marginal» y «financieramente es absolutamente inviable». En consecuencia, defendió una reforma del entramáu territorial y dixo que «España no da para tener 17 instituciones».

Ye curioso qu'esto lo venga decir una persona que, nos sos tiempos de presidente, afaló l'espardimientu de competencies ente toles comunidaes autónomes y amenó la segunda gran reforma estatutaria xeneralizada que tresfirió a les comunidaes, queriéndoles o non queriéndoles, competencies como la sanidá o la educación básica y media. Más entá, como nel casu d'Asturies la tresferencia féxola na mayoría los casos con dotación económica inferior al gastu real, y ensin ninguna previsión de crecimientu nel futuru.

(A mayor abundamientu, l'Estáu siguió dempués programando gastu obligáu pa les comunidaes autónomes, ensin tresvase de financiáción, como fexo Zapatero cola Llei de dependencia).

Y, a propósitu de les palabres d'Aznar, ¡atención!, porque, como yá dixera nel ensiertu del 02/01/2011, tamos asistiendo a un ataque furiosu contra les autonomíes, ataque que tan faciendo dende la derecha y la manzorga centralista hasta los partíos nacionalistes de Cataluña y Euskadi. Durán i Lleida, por exemplu, y Egibar acaben d'atacar la esistencia de les comunidaes que nun sean les que nel pasáu fueren, pa entendenos, les del 151.

Asina que, asturianos que creéis n'Asturies, !munchu güeyu cola xente de casa!, porque, si nun fueren pocos los centralistes y los partíos centralistes de tola vida, al centralismu antiautonomista acaben de sumase n'Asturies tres nueves fuerces polítiques: los del IDEAS, los de UPyD, los de Cascos.