¡Será por fame! (Areces nun pincha en Tapia)

Esti país probablemente nun va camín del depeñaderu, pero ye porque los ciudadanos tráguenlo too: encloyen ruedes de molín de dos en dos y dicen que son miruéndanos.

En tou casu, l'esperpentu agrándase día a día con nueves manifestaciones del ridículu de dalgunos políticos.

Esti miércoles, 23 de febreru, una parte importante del tiempu del Plenu del Ayuntamientu Tapia tuvo dedicáu a les fartures que col dineru de toos se regalen políticos y ciudadanos afortunaos. Y una estaya importante d'esa discusión tuvo centrada na protesta del portavoz del PSOE, porque, nuna visita del Presidente Areces a Tapia, ésti marcho con fame. «A modo de anécdota puedo decir que tuvo que parar a comer un pincho en un restaurante de Otur de la que marchaba a Oviedo», apuntó Lavandera, el portavoz del PSOE, na so intervención plenaria.

Esi fue'l postre la so intervención, porque'l platu fuerte consistió en decir que "nel actu sirviérense pinchos de tortiella, empanada, pollu fritu y aceitunes, tou con palillos". Y arreya que, en cuantes Areces coló (esprecetáu, hai que suponer, y aguiyáu pola fame) de la villa, «aparecieron los tenedores y se sirvieron bonito al horno, mejillones, calamares y chupitos», llamentóse'l portavoz socialista.

Si quieren seguir mexándose de risa pueden ver más datos en La Nueva España del 26/02/2008.

Si quieren seguir llorando nun tienen más que seguir votando a los mismos, anque probablemente-yos abonde con pensar no que yá votaren y vienen votando dende fai tiempu.

Tocántenes al gastu y a los dineros públicos, nun piensen en caxigalines como l'austeridá y otres coses d'esa mena, piensen, más bien, en cómo van ser éstos pa sacanos de la crisis si, puestos en venta na plaza, habría que dar perres pa que los llevasen. Y, asina y too, nun sé si daquién quedría acostinar con ellos hasta dexalos posaos en cualquier corneyal.