Dende qu'esta selmana entró en vigor la norma de les mascarilles semiobligatories, la verdá ye qu'hai más d'un 80 % con elles, probablemente un 90%. Sorprendentemente, hasta los grupos de rapazos suelen dir con ella.
Ente los que nun la lleven, hai dalgunos que miren desafiantes, como'l que diz "¡a mi van obligame!". Pero nun crean que los que nun la lleven son los probes o los desamparaos. Non, son xente normal, a munchos, pol vestir o pol móvil, véselos con posibles.
De toes formes, de los que lleven les mazcarites hai un montón que les lleven pa los policíes, esto ye, por si apaecen los policíes y los multen. Tribes que vi:
a) Los que la lleven de pendiente, colgando d'una oreya, b) los que la lleven de brazalete (nun vi más qu'una), c) los que la lleven encolingando na mano, d) los que la lleven al piscuezu, como una bufanda, e) los que la lleven nel cazu, per baxu la boca, f) los que solo atapen la boca, pero non les ñaples (esto últimos igual nun lo faen del too toos pola policía).
Ye verdá que la mayoría llévala bien puesta y que dellos de los que van medio atapaos (pocos) súbenla al cruzase tigo. Por decilo too.
En fin, tantes xentes, tantu mieu, tantes trampes.
No hay comentarios:
Publicar un comentario