Ramón Quirós ye persona que nun anda amatagáu. El conseyeru de Salú afala les aviéspores colos sos guionazos cuandu fala. ¿Recuerden vustedes aquello de qu'al trabayu los mélicos teníen que dir "desayunaos, cagaos y col periódicu lleíu"? Bueno, pues esta selmana atrás volvió armala al acusar a unos mélicos de faltar munchu al trabayu y a otros de recetar les melecines más cares solo pa fastidiar y gastar.Ñidiamente, mélicos e insituciones méliques salieren a protestar y a defender la so bona xestión y el so "honor".
Nun se despisten vustedes, al marxen de les formes nes declaraciones del conseyeru, lo importante ye lo que ta embaxu d'elles: les dificultaes pa pagar el gastu sanitariu, yá en servicios, yá en melecines u otres prestaciones. Recuerden que na última fuelga de los mélicos llegóse al alcuerdu de poner en relación la suba de complementos cola so contribución a la reducción del gastu farmacéuticu (a esti respectu, l'ensiertu de mañana, 23, ye un artículu sobre la cuestión que yá publicara yo dempués de la fuelga y del alcuerdu).De mou y manera que, más pronto o más tarde, va frenase'l gastu sanitariu y ponese-y llendes, yá sea pola suba d'impuestos, yá pol establecimientu de tases, bien pol incrementu de lo que pagamos polos melicamentos.
Al tiempu.
Y equí lo importante nun ye evitar lo inevitable, sinón dos coses: evitar que'l retrasu en facer lo inevitable nos conduza al depeñaderu; tomar medíes de mou y manera que se garantice la sanidá universal y que les decisiones que se tomen sean afayaíces.
Y, equí, lo que tienen qu'entrugase los ciudadanos ye si lo pueden facer bien los que siempre lo vienen faciendo mal. Anque digan que lo fain nel nome de los probes, de los proletarios, del pueblu o de lo que sea.
No hay comentarios:
Publicar un comentario