El martes 15/06/2010, col títulu de "Va enterase San Xuan", falaba yo del permal e inusual tiempu d'esta selmana y media y amenazaba en broma con castigar al patrón de la dómina, San Xuan, con sometelu a los castigos con que les mentalidaes máxiques amenacen o castiguen a los patronos celestiales si les coses nun van como deseen los fieles.
Bueno, pues paez que l'avisu nun valió un res: conozse qu'allá enriba anden un pocu tenientes o que nun tienen en munchu al amenazador. El casu ye qu'estos tres díes caberos, y tresallá de les desgracies personales d'A Veiga, munchos asturianos vienen padeciendo llaceries, peligros, sustos, empapiellos y daños col agua y les inundaciones: La Villa, Les Arriondes, Sama, Pravia, Trubia, San Vicente y una desinfinidá de llugares y barrios tán enaguaes y cientos de persones tuvieren qu'empobinase de les sos cases, de los sos trabayos o de les residencies o hespitales onde taben.Qu'esto abocane, que nun hebia más daños, que la xente tope ayuda p'aperiar y acutixar les cases y les coses y que reciba les indemnizaciones a les que tien derechu..
Y, a toos, ¡puxu y ánimu!
No hay comentarios:
Publicar un comentario