Llanto equí esta carta de Milio Rodríguez Cueto, ún de los meyores escritores españoles (sí, españoles) contemporáneos. Nella acusa a la Universidá d'escaecese del asturianu y del cumplimientu de la llei, asina como a les autoridaes gubernamentales "progresistes" (PSOE e IU).Lo que tien de desagradable esa realidá tienlo de prestoso que don Milio, sobre escribir perbién, guarde la so capacidá d'esprecete escontra la persecución de la nuestra llingua.
¡Y CONTRA L'ESCAEZU LOS NUESTROS INTERESES: LLEAN LES LLINIES FINALES!
28 de Mayo del 2010 - Milio Rodríguez Cueto (Xixón)La prueba de PAU, que faen los estudiantes que quieren ingresar na Universidá, presenta novedaes importantes esti añu. Ente les más notables, la reducción de les pruebes obligatories a cuatro (que componen lo que se llama fase xeneral) y la posibilidá de subir la nota que se saque presentándose voluntariamente a otros tres esámenes d'una fase específica, que namás cuenten si s'aprueben. D'esos tres esámenes, les notes de los dos meyores pueden multiplicar la de la prueba obligatoria por un coeficiente de ponderación atribuyíu, que puede ser de 0,1 o de 0,2.
Estes pruebes específiques voluntaries van ser mui interesantes pa los alumnos que quieran matriculase n'estudios con places limitaes, nes qu'haya que superar una nota de corte. En consecuencia, pa en delantre, la elección d'optatives en Bachilleratu va tar condicionada por esta conveniencia y les materies que la Universidá d'Uviéu nun considera ponderables van ver cómo la so matrícula en Bachilleratu se reduz enforma, si nun desapaez.
La llingua asturiana nun apaez citada, nin siquiera, ente les materies de la fase específica. Prácticamente debe ser la única materia optativa en Bachiller que nun figura. Si ún se para a pensalo, ye verdá que los estudiantes de Filoloxía nun van tener problemes de numerus clausus, pero sí los hai en Maxisteriu, onde tamién s'estudia asturiano, y pa ingresar n'esa facultá considérase méritul conocimientu de Bioloxía, Ciencies de la Tierra y Medioambientales, Dibuxu Artísticu, Dibuxu Técnicu, Diseñu, Economía de la Empresa, Física, Xeografía, Griego, Historia del Arte, Latín, Literatura Universal, Matemátiques, Química, Técniques d'Espresión Gráfico-Plástica, Análisis Musical, Anatomía Aplicada, Artes Escéniques, Cultura Audiovisual, Economía, Historia de la Música y la Danza, Historia del Mundu Contemporaneu, Llinguaxe y Práctica Musical y Volume: cualquier cosa menos Llingua Asturiana, pese a formar parte de los planes d'estudios pa la titulación.
Dicho dotra manera: ye fácil de suponer que la signatura de Llingua Asturiana acabe desapaeciendo de les optatives de Bachiller cola disculpa de que naide la pide, pero naide la va pidir porque los que tienen potestá pa ello deciden que val menos que toles demás pa ingresar na Universidá d'Uviéu. Dándo-y la vuelta al asuntu, ponderar con 0,2 una prueba de Llingua pa entrar en cualquier facultá asturiana sería un procedimientu, amás de legal, inmeyorable pa da-yos preferencia a los estudiantes desta tierra al tiempu d'aspirar a les places limitaes y apetecibles de facultaes como Medicina, Enfermería o Fisioterapia, que siempre llamen xente de fuera. Un poco de proteccionismu diba veninos bien n'Asturies: nun vamos ser los únicos que xueguen al chinchón ensin comodines.
Milio Rodríguez Cueto (Xixón)
No hay comentarios:
Publicar un comentario