Areces, de coña

Durante l'actu d'inauguración de la nueva sede de l'Academia de la Llingua Areces presumió "del trabayu fechu pol so gobiernu pa dignificar l' asturianu" (ver La Nueva España del 28/10/10).

¡Él! ¡El perseguidor y odiador visceral del asturianu! ¡El que nos sos cuatro primeros años de gobiernu paralizó dafechamente la Llei d'Usu y Promoción del PAS! ¡El que, de nun ser porque entra IU nel gobiernu nun faen nin la puxarra que tan faciendo agora! ¡El qu'ordenó que nun s'emplegase l'asturianu na TPA nos espacios "ordinarios" si nun yera en coña o "entrecomillándolo prosódicamente! ¡El Presidente d'un partíu visceralmente contrariu a les señes culturales y identitaries asturianes, que yá tien firmao col PP un rebaxa del artículu 4º l'Estatutu y la lliquidación de la Llei d'Usu y Promoción! ¡Él (ellos, el PSOE), que tardaren 12 años en da-y un nuevu allugamientu a l'Academia, tan necesariu!

Pero, en fin, ya lo decía Christian Morgenstern: "Nun ye al tiranu al qu'hai que denostar, sinón al siervu que sirve al dictador".


PS.: L'interés, apreciu y respetu a la nuestra llingua puede vese EQUÍ mesmo, nel discursu "oficial" con motivu la inaguración de la nueva sede de l'Academia de la Llingua del que lleva 11 años como presidente d'Asturies (y 12 años más como alcalde de Xixón).