Fai pocos díes el TSJA dictó una sentencia importante sobre l'asturianu y el cumplimientu de la Llei d'Usu y Promoción. Lo que diz el megollu la sentencia ye que'l requisitu llimitatoriu que'l Gobiernu Asturianu punxera de que pa dar asturianu debíen pedilo un mínimu de 8 alumnos contravién la Llei d'Usu y Promoción, que garantiza a tolos asturianos el poder estudiar la so llingua en tolos niveles y ámbitos de la enseñanza. El recursu qu'afaló la sentencia promovíólu CCOO.
Yo quiero recordar -con orgullu- qu'esa llei fue una llei qu'el PAS impulsó y que pactó col Gobiernu Marqués, y que, pesie a les dificultaes que punxeren el PSOE, munchos funcionarios y parte'l PP, conseguimos sacala adelantre.Quiero recordar tamién que, nel so día, avisamos a tolos grupos culturales, sindicales y políticos interesaos na defensa del asturianu y de l'asturianidá qu'esa llei yera lo único que díbamos tener en munchos años.
Vo recordar tamién que, por sacar alantre esa llei, acusárennos de traidores l'asturianismu cultural, IU, CCOO, y un llargu etcétera d'analfabetos y antiasturianos. Y ficiéren escontra nós una campaña de mentires, llevantos y enfallentos descomanada.
Cómo non traer a les mientes que dixéramos mil vegaes qu'esa llei encloyaba munchu más de lo que paecía a primer vista y que, de tar puesta nes manes d'un Gobiernu asturianista, podía sacáse-y munchu permunchu. Diximos tamién que, puesta nes manes de gobiernos antiasturianos o falsamente asturianistes -como los que tuvimos o tenemos-, esa Llei yera un instrumentu inútil, porque pa los enemigos del asturianu y del asturianismu nun hai otra política que la del xenocidiu cultural.
Y agora, cómo se ve, tol mundu recurre a los tribunales (nun ye la primer sentencia que, sofitándose na Llei d'Usu -¿y ónde si non?-) apoyándose na Llei del PAS pa conseguir derechos pal asturianu y los asturianos. Y, como la Llei ye eficiente, consíguense.
¡Ah, si nesti país hubiere más paisanos y muyeres, y menos xentina y xentiquina!
No hay comentarios:
Publicar un comentario