La claridad de don Javier Fernández



Nes pasaes xornaes, nel so primer mitin como candidatu, en Mieres (ver gráficu superior), el hasta agora candidatu a candidatu y agora candidatu, don Javier Fernández, afirmó que "nuestro modelo para el futuro (pa él y pal PSOE) es el de Las Cuencas". Naturalmente, les alarmes saltaren inmediatamente: si la zona con más paru d'Asturies, con el doble de paru xuvenil, con una escasa incorporación de la muyer al trabayu, entá degradada en munches zones, d'alta conflictividá social, con inversiones multimillonaries infrautilizaes o tiraes en caxigalines, con un abandonu continuo de la población y otros datos eiusdem furfuris son el modelu pal conxuntu d'Asturies, ¡vamos bonos!

Pero nun yera eso lo que quería decir don Javier Fernández (responsable de los últimos diez años de la política d'Areces y de la venta d'Asturies a los catalanes) colo de "nuestro modelo para el futuro es el de Las Cuencas". Lo que quiso decir ye satamente eso, "nuestro", esto ye, toa Asturies como agora nes Cuenques: si ún quier entrar n'Hunosa tien que pasar pel PSOE y pel SOMA; si quier un empléu nel ayuntamientu, masque sea pa un empléu temporal de tres meses, tien que pasar pel PSOE y pela UXT; si se quier un permisu pa una obra o p'abrir un negociu y se quier que se despache rápido, hai que tar a bien col PSOE y cola UXT. Si se quier nun ser mal vistu socialmente, recibir subvenciones, etc., tar a bien col PSOE y los sos palanganeros, lo que quier decir, a vegaes, cola segunda marca del PSOE, IU.

Eso ye. Tovía hai coses que se-yos escapen n'Asturies y persones que nun se dexen asobayar n'Asturies. Y eso nun se puede permitir: modelu Les Cuenques pa toa Asturies.

No hay comentarios: