El PSOE sigue atacando al asturianu y a los asturianos

L'Aconceyamientu de Xuristes pol Asturianu vien trabayando desayaque por denunciar los incumplimientos que'l PSOE (decir el Gobiernu Areces sería querer despistar y engañar a la xente) vien faciendo pa coles sos obligaciones al respective del Estatutu y de la Llei d'Usu y Promoción.

El fondu de too ello nun ye más que, como venimos denunciando dende'l PAS cuantayaque, la concepción que'l PSOE (y el PP) tienen del asturianu como patois y la voluntá de dambos de facer tolo posible pol esaniciu de la llingua llariega, incumpliendo, al mesmu tiempu, el mandatu estatutariu (obra d'esti blogueru que se comunica con vustedes) y la Llei d'Usu y Promoción (obra del PAS).

Una muestra más d'esta voluntá y d'esi incumplimientu son les palabres que provienen del Gobiernu asturianu (del PSOE, en realidá) a través de la Dirección Xeneral de Política Llingüística. Son les que se contienen nesti testu qu'asoleyó l'Aconceyamientu de Xuristes, y que nós sopelexamos:

El cuartu na forma y términos nos que la Direición Xeneral de Política Llingüística retruca (y el verbu ta permidíu) a los nuesos argumentos xurídicos. Respeutu a la forma, emplegando, esclusivamente, un castellán rellambíu, siendo asina que los escritos de nueso van del too n’asturianu. Nos términos, enseñando, como’l llobu del cuentu, la peluda patina perbaxo la puerta, al descalificar a la llingua asturiana (“la configuración del bable/asturiano en el Estatuto de Autonomía como “modalidad lingüística” ), emplegando la espresión “modalidá llingüística” non nel sentíu respetuosu con que lo fai l’artículu 3.3 de la Constitución, sinón nel faltosu acuñáu per aquellos doctrinarios “bien pensantes” conxuraos nos años ochenta (y anguañu felizmente esconxuraos) escontra la llingua del país, que l’aventaben como sinónimu de dialeutu, xíriga o tatarexu.

Como’l raposu enantes pierde’l rau que los malos vezos, la Direición Xeneral de Política Llingüística miente otra vuelta más con tala afirmación porque l’Estatutu d’Autonomía d’Asturies en nengún sitiu espresa la condición del bable/asturianu y la Llei 1/1998 que lu desendolca (per mandáu del so artículu 4.2) califícalu como llingua tradicional d’Asturies (artículu 1) que non como modalidá llingüística.

Otra vegada, al altu la lleva: el que vote al PSOE (o a los sos palanganeros de IU) ta escontra l'asturianu y la cultura asturiana, y trabaya, cada vegada que vota, escontra ellos.

Dotramiente: naide que tea nel PSOE o IU puede pensar otra cosa sinón que ta escontra del asturianu y de la cultura asturiana.

Y del PP, ¡pa qué vamos decir ná!