Según saben, la FSA ta intentando sustituir a don Vicente Alberto Álvarez Areces como candidatu pa les prósimes elecciones y quier poner nel so llugar a don Javier Fernández.(Alviértase bien, don Javier Fernández y don Vicente Alberto son "tanto monta monta tanto": no sólo piensen lo mesmo y faen lo mesmo, sinón que son corresponsables de tola política económica desastrosa del PSOE y de los apoyos a les polítiques antiasturianes que se desendolquen nel estáu.)
Pues bien, ún de los últimos socialistes qu'acaben de manifestase a favor de don Javier Fernández y a la escontra de don Vicente Alberto fue don Eduardo Donaire, cabezaleru de la rama'l metal de la UXT-PSOE.
Pues esto yera que, pocos díes dempués d'eses declaraciones de don Eduardo Donaire, tópense dambos; don Vicente y don Eduardo. Ehí los tienen na semeya. Arreparen pa ellos: míren-yos la cinésica y la prosémica, cómo separen los cuerpos y los distancien al másimu; cómo l'ún tien qu'espurrir bien la mano p'algamar la del otru; de qué que mou y manera eviten mirase a los güeyos; cómo se-yos nota la tensión de los músculos faciales pa estirar los llabios como si sonriesen.
Miren y amiren pa la semeya de La Nueva España, que ye tou un exemplu de tensión, un decháu, el paradigma del amor ente xermanos.
No hay comentarios:
Publicar un comentario