¡Un pulpu de 7,5 kg!

Ayer, domingu 27, anduve pel pedreru. Yá sé que tamos entovía en veda, ¡pero qué-lle vamos facer! Yá sabemos toos lo que ye un petite, una necesidá y un pruyimientu.

El casu ye que nun se me dio ná bien en tola marea. Pero, con tou y con ello, a la hora marchar (diz el refrán que les marees, como les pelees, nun terminen hasta qu'ún nun ta en casa), allá cerca un rescañu atopé un centollu. Garrélu pensando cometer otra illegalidá, y, ¡meca!, resultó que taba vaciu.

(Yo nun sé si vustedes vieren en dacuandu un centollu o una andarica escanucaos por un pulpu, déxalos talos cualos si tuvieren vivos y enteros, pero ensin nada dientru (neto que'l Gobiernu a los contribuyentes).

Yera evidente que perillí hebia un pulpu. Pa abreviar, dempués de munchu andar perriba y perbaxu la charca, allá, a un estremu del rescañu salió un rayu y, ¡madiós!, en cuantes vi'l rayu pensé que nun diba ser pa saca'l pulpu. ¡Como un brazu yera!

Bueno, pa face-yos el cuentu breve, que-y gusta decir al mio amigu Sergio Marqués: tuvi peliando más de media hora y, al final, gamazu va gamazu bien, y munchu apuxar y afitar les pates nel suelu (¡y a too esto, manín, la marea subiendo, que creí que me chaba o m'afogaba!), acabé sacando un pulpu que, pesáu dempués en chigre, pesaba siete kilos y mediu un poco llargos. Yera tan grande que, de mano, en vede un octópodu, talanté que yera un decápodu, tanto tiraba y tanto m'echaba los rayos al redor del cuerpu (tengo entovía marques como si tuviere padecío l'herpes zóster, la culebrina). Pero, en realidá, nun tenía diez pates, según vi dempués más a les clares, pasáu l'aforfugón y ya chaos a tierra los dos, elli y yo, tenía siete, porque-y faltaba una, esto ye, faltaba-y l'ectocótilu, que ye'l rayu que los machos y meten a la fema (a la pulpa) dientru'l cuerpu pa cha-y l'esperma.

Que conste que, cuando taba fuera y -y lo comenté a un puntu que dempués pasaba perillí y m'entrugó pol brazu que faltaba al pulpón, pasóme una cosa percuriosa. Y ye que, de golpe, de sópitu, el puntu chose al suelu, amiyó y encuruxóse lliteralmente y púnxose a llorar, dando unes berríes tremendes y diciendo:

- No somos nada, no somos nada.

Dempués enteréme, por una moza que, mientres me lo decía dába-y por suspirar, nun sé por qué, que'l puntu, polo visto, yera ún que llamen "conde Lequio", o asina, y que, tamién polo visto, veranea per estes tierres en dacuando.

Ehí tienen una imaxen del pulpu: ta roxu nun porque tea cocidu, sinón porque ta emberriacáu (la semeya saque-yla enantes d'engamalu, mentantu m'amenazaba).