Asturianos fuera la patria

Nos medios de comunicación asturianos asoléyense a lo llargo l'añu, pero mui especialmente estos díes, les persones y les opiniones de tantos xóvenes asturianos que tienen que vivir fuera d'Asturies y d'España pa ganase'l pan o pa poder perfacer el so proyectu vital, la puesta en práctica de les sos capacidaes y la búsqueda del cumplimientu de les sos ilusiones.

En toos ellos, moces y mozos, destaca una cosa: el fondu amor a la so patria, Asturies, onde, la mayoría desearín pasar la so vida y a onde vuelven en cuantes pueden o les circunstancies los dexen.

Pero nes sos palabres apaecen siempre les mesmes quexes: la imposibilidá de perfacer equí la so profesión, nuna economía probe, llimitada y de salarios baxos; l'arcaísmu y el conservadurismu d'Asturies, una sociedá que mira más al pasáu qu'al presente y que ta perdistanciada de la vida y la economía del restu'l mundu, nun sólo polo que ye, sinón polo que se piensa que debe ser; y con ello, la falta xeneral d'esfuerzu, el conformismu.

Asturies ye pa ellos, polo tanto, una mala madre a la que, ensin embargu, ellos quieren más qu'a naide.

Pues bien, nestos díes de Navidá, a toos ellos, a toes eses moces y mozos que tuvieren que salir pa emplease, pa trabayar no que-yos gusta o pa poder respirar (l'aire n'Asturies ye escasu y afogaízu), que podíen decir, como'l personaxe del Quijote, "A la guerra me lleva / mi necesidad. / Si tuviera dineros, / no iría, en verdad.", a toos repito, una feliz Navidá -equí, si puede ser- y el deséu de lleva-yos el dulce regustu de la señardá de la patria.

Pero la sociedá y la economía nun son los montes o'l tiempu: la sociedá y la economía podemos camudalos nós, cola nuestra voluntá, el nuestru empeñu y los nuestros votos. Y a vegaes, lo único difícil que tienen les coses ye nun querer imaxinanos como podíen ser si fueren d'otra manera, porque, una vegada imaxináu'l futuru talu como lu queremos, ye más fácil poner rumbu a él, trazar el camín y disponer los aperios pa facelo.

Un abrazu señardosu a toos (nun solo tien señardá'l que ta fuera, tamién los que tamos dientro podemos tener señardá de los ausentes).

Y ehí va la despedida, con unos versos que, a comuña, ficiéremos Espriu y el qu'esto bloguea:

Tamién só yo montesín y cobarde

y pertengo querencia

con un

desesperáu dolor

aquesta meva pobra

bruta, trista, dissortada patria,

a esta patria:

probe,

tocha, triste tierra,

ensin suerte Como nunca amaste tu

O que cansat estic, meva

cobarda, vella, tan salvatge terra

anda y señálame un sitiu

onde yo me pueda dir

solín a llorar mios penes

que contigo, que por tigo cometí.

Anda y señálame un sitiu

pobra,

bruta, trista, dissortada patria.