Más d'Acéfalos llexislantes, el casu de Mieres

L.A.N., una guineana que vive en Mieres, acaba de pasar un aforfugón d'esos que pasen munchos ciudadanos gracies a esos fenómenos cefaloñálguidos que sienten la cabeza (bueno, non la cabeza nun la sienten na vida, la mayoría, lo que sienten, toos, son les posaderes, que ye pa onde-yos cae'l muérganu de pensar) na Carrera de San Jerónimo.

Resulta que, allá per mayu del 2008, reñó cola fía, d'once años, hacia les once la nueche y, alderique va, alderique vien, dio-y un currionazu. La rapacina salió de casa y corrió a denunciar a so ma al curtel de la Guardia Civil. Naturalmente, instruyóse una información, el casu fue pal xulgáu y a L.A.N. pedíen-y un añu de cárcel, la separación de la fiya y 150 euros d'indemnización a la ñeña. Al final, en daqué medía hebo suerte y la sanción quedó en 3o díes de trabayos en beneficiu la comunidá y 150 d'indemnización a la fiya (qu'agora tien doce años).

Naturalmente, tol procesu tien el so sofitu na supresión del artículu del códigu onde se decía que "los padres podrán castigar de forma moderada a sus hijos", que de manera tan piquera y con tanta gayola esanició´l Congresu de los cefaloñálguidos.

Vamos dexar agora a la ma. Vamos pasar a la fiya, que, obviamente, debería ser l'oxetu fundamental de l'atención, ya que, debe suponese, la cuestión cimera nesti procesu son les relaciones ente madre y fía y el desendolcu educativu de la rapaza, el so crecimiento como persona.

Nun vo decilo yo, van responder vustedes.

La sanción, incluyíos los 150 euros colos que la ma tien que "indemnizar" a la fía, ¿va meyorar les relaciones ente les dos?

A partir d'agora ¿va ser más fácil que fiya y ma s'entiendan o la ma va vivir siempre embaxo l'amenaza d'una fía que sabe que la puede denunciar a les primeres de cambiu, con verdá o ensin ella?

¿La ma va tener dalguna autoridá pa cola fía? Esto ye, ¿pa que llegue a casa a la hora, faga los deberes, collabore nes xeres llariegues, etc?

¿Va tener qu'acabar la ma nel futuru pidiendo al xuez que-y quite a una fiya que nun puede con ella y delantre la cuala acaben de quita-y tola autoridá?

¿La sensación de trunfu y dominiu sobre los mayores va facer meyor persona a la rapaza, más capaz de convivir colos demás na sociedá, más realista en cuantes a los llímites de lo tolerao y de les llendes que caún de nós pon a los otros?

Yo tengo más entrugues, a lo meyor ustedes pueden facese más. Yo creo que sé la probabilidá de que los resultaos vaigan nun o n'otru sentíu. Seique vustedes, tamién.

Fáganles y arrespuéndan.