El reciente premiu Príncipe d'Asturies a Berlín y los berlineses ye un premiu, d'un llau, un poco ficticiu y, d'otru, ye un premiu que yá se dio dos vegaes, en concretu, nel 199o, a Mijail Gorvachov y, nel 1996 a Helmut Khol. Ellos fueren los grandes artífices de la hestoria del esbarrumbamientu del muru de Berlín, del argayu del telón d'aceru y de la unificación alemana.
Mijail Gorvachov el primeru, porque cuando nel 1989 entama la resquiebra del telón d'aceru y los alemanes orientales, ente otros prisioneros, empiecen a pasar al mundu llibre a través de la frontera austro-húngara, el dirixente rusu nun da orden de cerrala, del mesmu mou y manera que, poco dempués, niégase a poner en marcha el Pactu de Varsovia -como se-y pide dende tantos estaos del este d`Europa- pa reprimir l'apertura nesos países, apertura a la que, darréu, va seguir la llibertá. 
Y Helmut Khol porque, frente a la rocea y oposición de dirixentes como Margaret Thatcher y François Miterrand -ente otros-, que solicitaren a Gorvachov que nun permitiera la unificación d'Alemania y que s'opusieren a ella, creyó nuna Alemania arreyada y ensierta, y emburrió hasta que lo consiguió. Y, de la mesma manera, dempués, tuvo qu'enfrentase nel so propiu país a los socialistes del SPD, que nun queríen la unificación económica y política ente les dos alemanies, y que preferíen caltener dos sistemes separtaos.Asina qu'a ellos, sobre tou, a Helmut Khol y a Mijail Gorvachov, débe-yos Alemania'l ser lo que ye, asina como-yos lo deben Berlín y los berlineses; del mesmu mou qu'Europa y los europeos-yos debamos el ser lo que somos agora.
Gloria, memoria y honor a dambos.
No hay comentarios:
Publicar un comentario