L'Ayuntamientu de Xixón vien sumándose últimamente a la fola d'atracos a radar armáu de los socialistes de toles alministraciones. La última de que tengo noticia dase en La Guía, na recta que va dende la glorieta d'El Puentín a la primer glorieta de Viesques (onde tirando a la manzorga vase pa la carretera La Llaboral y pal futuru ferial de Paco Ignacio Taibo).Pal que nun lo conoza hai que decir que son unos cuatrocientos metros de doble carril peranchu, con separtaderu p'aparcamientu y aceres tamién anches. La mayor parte'l día'l tramu malapenes tien circulación nin de peatones nin de coches.
Pues bien, el conductor que sal de la retonda La Guía (y que fácilmente puede dirixise a l'autopista pa dir pa Uviéu o pa Santander) tien delantre sí cuatrocientos metros y dos carriles ensin tráficu, ensin coches aparcaos y ensin peatones pela acera. Lo natural, polo tanto, ye que pise y se ponga a 70 u 80 en pocos metros, que nun ye pasase en nada. Pero, ¡ai amigu!, la velocidá ta llimitada a 50 km h. Y ye equí onde vien la cosa: un coche disimuláu de la policía municipal espera aparcáu nel apartaderu de coches al incautu conductor que, nun viendo tráficu, peligru nin xente, camina a una velocidá normal, y decimos normal porque pa circular a 50 fai falta dir pisando'l frenu. Y ye ehí onde lu esperen Pacita y la multa: escondíos como'l raposu, con un coche amarutáu, nun sitiu onde nun se ve maldita circulación nin peligru. ¡Pa estos medios ponemos los ciudadanos les perres, pa esto votamos a esta xente! Pa que tean atechaos esperando atracanos a radar armáu.
No hay comentarios:
Publicar un comentario