Humberto Gonzali, Maite, Illán, Berto Peña, Aurora y el restu l'equipu tán faciendo de forma perfecha esta cabera Arribada de Xixón, la de 2009. La verdá ye un méritu estraordinariu -especialmente nesti país nuestru, tan poco trabayador, tan poco seriu- una convocatoria que s'espurre a lo llargo los años, diendo cada vegada a meyor.Pero, sobremanera, esta Arribada de Xixón 2009 ta arreblagando perriba lo yá fecho, programando dellos actos -la mayoría d'ellos interesantes- cada día y faciendo los alcuentros a lo llargo de casi tres selmanes.
¡Llástima que, como siempre, los asturianos seamos tan asturianos, los asturianistes más asturianos entovía que los asturianos y el país, la xente, tan como ye! D'esi mou y manera l'asistencia y l'interés polo qu'asocede tresallá del bardial propiu vienen siendo más bien escasos.En tou casu, quítome la montera pa saludar y felicitar l'Arribada y la xente que lo lleva.
2 comentarios:
Totalmente d'acuerdu col to comentariu , esta xente que trabaya y fai posible l’Arribada, bien merez el reconocimientu públicu del so trabayu . Tan faciendo muncho y bien .
Tamién ,toi dafechamente d’acuerdu,col siguiente comentariu que faes :
“l'interés polo qu'asocede tresallá del bardial propiu vienen siendo más bien escasos”.
A mas d’esto que comentes , dase muncho lo que yo llamaría “efectu palombu” .
Como ye bien sabio'l palombu posase, echa la cagada y d’esmenu sal esnalando otra vegada.Esta espresión suel emplegase nel tarrén llaboral, cuando apaez el xefe y t'apurre una xera nueva aparte de la que ya tenies, y que pa encima ye abondo abegosa .
Bueno, pues yo esi “efectu palombu”téngolu observao bien de veces, nestes ediciones de l'Arribada . Nes que normalmente un ponente llega , cuenta o presenta lo suyo y darréu cola del llugar ensin el mas mínimu interés polo que van contar o presentar el restu de los ponentes que bien darréu d’elli .
Esto dase casi siempre, salvo honroses esceiciones nes que t'incluyo a ti Xuan .
Un saludu y norabona a ti pol Blog ,y a la bona xente de l’arribada pol so llabor.
sí, mui guapos los eventos pero hai un problema grave de fondo. Los organizadores y Pilar Pardo la que t'entregó'l premiu l'añu pasáu pertenecen a un partíu políticu contrariu a la oficialidá de la llingua ya incluso a la propia llingua. ya nun val eso de que como ta n'asturianu hai que dir hai que ver lo qu'hai detrás. Nun vamos dir a un mitin del PP porque tea n'asturianu non? Igual lo que tienen que facer los organizadores ye facese col poder total dientro del pp y cambiar tou esi partíu casposu dafechu. Igual si los organizadores nun fueren de nengún partíu políticu diría más xente pero'l pp tien munchos enemigos nel asturianusmu y eso ye una realidá, fáigase la conferencia n'asturianu o en suahili. hai xente que trabaya por interés artísticu otros por intereses políticos pidiendo suvenciones. Non too ye lo mesmo nel asturianismu.
Publicar un comentario