Gürtell y financiación illegal

Ye difícil entender racionalmente otra cosa que'l que la base del casu Gürtel ye la financiación ilegal del PP, polo menos, de les campañes electorales. Sólo dende ehí se puede talantar qu'una serie d'empreses puedan conseguir favores d'adxudicaciones de les alministraciones gobernaes pol PP (dende alcaldíes a comunidaes autónomes, polo menos). Adquier plenu sentíu como racionalidá probabilistica y como sentíu común esperiencial, pero ello desplica tamién por qué eses empreses s'encargaben, ente otres coses, de les campañes electorales del PP.

Qu'a partir d'ehí entrase a funcionar l'eternu "el que parte y bien reparte y en el partir tiene tino siempre lleva de contino para sí la mejor parte" (vamos decilo con un refrán del castellán vieyu, ya que son castellanos vieyos la mayoría los enguedeyaos nesta rodiella) constituye parte de la "física" del ser individual y del ser social humanu. Que, dempués, además de los organizadores del entramáu base entrasen a participar cargos públicos, tamién. Que finalmente too ello s'enduviellare en díes de vinu y roses, esto ye, en coches, traxes, lluxos, folixes y putes cares nun puede estrañar a naide: ye la pura naturaleza humana. Que, dempués, grabaos cuando nun se sabíen sentíos, se manifestasen como son, na so plena toscoboyería, xostronería y zafallonería tampoco tien ná d'estrañar: ye asina la mayoría la xente que xunta la borrachera de les perres y l'abusu de poder, sobre too si son nuevos no de les perres. ¿Qu'además rutien con un poco más de golor a morciella porque son de dereches? Puede ser. ¿Puede ser? Bueno, pues como Roldán y otros, más o menos.