El carbayu lliterariu: Antón García

Xente tan cerca ye una magnífica colección de cuentos del tuñense Antón García, onde s'amiesten hestoria, imaxinación, costumismu, humor y tenrura, too ello con una cierta unidá narrativa y, especialmente, de tonu.

Dellos son estremadamente breves, como "Elecciones", que malapenes ocupa dos páxines; "La mar imaxinada" estiéndese por ventidós páxines.

Pal mio gustu, lo más destacao de tol llibru (que ye, repito, prestosu y entretenidu) ye, d'un llau, la llingua -al mesmu tiempu culta y dialectal- y, d'otru, el tonu del decir narrativu, tan personal, tan sele, tan d'Antón García. Perespecial resulta la variedá temática y de perspectives dientru d'esa fundamental unidá d'estilu.