Comunícame un amable seguidor d'estos ensiertos (Xabel) que'l nuevu llogotipu de Xixón incumple los alcuerdos firmaos ente'l PSOE y IU (y sopelexaos por IU) pa da-y tratu igualitariu al asturianu y al castellanu nesti tipu de coses.Per partes, en primer llugar, hai que señalar qu'esti llogotipu gana con munchu al anterior (aquel de la "G" enxareyada con una "A"), que naide sabía lo que yera nin significaba, colo cualo, evidentemente, la so capacidá propagandística (p'atraer turismu, ente otres coses) yera cero. Esti (un "gijón" que tien debaxu un "Asturias con sal") nun ye que sea una xenialidá nin una ayalga estética, pero, polo menos, ye claru y tien un daqué de gracia.
Pero pensar que los presuntos compromisos ente'l PSOE y IU sobre l'asturianu van cumplise nun se-y pudo ocurrir más qu'al que ye un pinín, o ta cegaratu -de suyu o pola fe-, o tien intereses en IU. Porque nin el PSOE quier saber nada col asturianu nin ye pa IU una cuestión de munchu interés, más allá de les campañes electorales, nes que sabe que, con un pocu d'afumamientu d`asturianu y unos ensalmos, atonta les abeyes y failes posar en cestu.
Porque pa esto del asturianu la política de IU acuéyese al refrán: "Prometer hasta meter, y dempués de metíu, nada de lo prometíu". O, como decía'l vieyu chiste de Quevedo (que ye tamién un cuentu asturianu, ensin Quevedo, claru) cuando'l rei y diz a la princesa que'l sacu de monedes d'oru que-yos prometieren nun yera oru, sinón "chapines", lo que-y arrespuede la princesa dende dientru'l cuartu nel que'l pagador yá ta puestu al asuntu:-Si son chapines, como si son chapones, yá me la tien metía hasta los...
Pues eso, dempués que se votó, hasta'l prósimu engañu, digo, dicen, la prósima campaña electoral, que siempre va haber abeyes dimpuestes a posar al llamáu de l'abeyera y les voces del amu.
1 comentario:
Munches gracies Xuan Xosé pola respuesta.
De toes formes nun taría de más recordar dalgunos artículos de la ordenanza municipal del usu del asturianu pa comprobar l'incumplimientu dafechu d'estos alcuerdos que queden en papel moyao:
· Esta Ordenanza se aplicará en todo el término del concejo de Gijón/Xixón respecto a la actividad del Ayuntamiento y de la Administración Municipal en todos sus Departamentos, Servicios, Sociedades y Organismos.
· En las publicaciones, actividades y servicios municipales se utilizará el asturiano y el castellano de forma adecuada en consonancia con lo previsto en los artículos 3 y 4 de esta Ordenanza.
· El Ayuntamiento fomentará y promocionará el uso del asturiano en todos los ámbitos de la vida social y en las diversas actividades culturales, deportivas, mercantiles y cualquier otra.
Nun se si Xixón tien sal o pimienta, sé lo que nun tien, y son responsables políticos al altor, anque siendo'l pueblu soberanu tendrán razón aquéllos que dicen que tenemos lo que nos merecemos.
Recibe un saludu saláu.
Publicar un comentario