Los últimos díes vienen enllenos de noticies espelurciadores, que, en conxuntu, signifiquen que se paren la obra civil y la inversión y que va incrementase'l paru. Por si nun fuera poco colos últimos datos, además, apaez la Ministra Beatriz Corredor y anuncia que, prácticamente, suprime les ayudes a la vivienda de protección. Eso sí, mantién les del alquiler, una ficción económica, la de les gabites al alquiler d'escasu rendimientu, si nun ye, como parecen confirmar dalgunos estudios, que fai, en realidá, subir los precios.
Per otru llau, tola obra pública de l'autovía del Cantábricu y de les demás obres que dependen de Madrid va paralizase dafechu, porque'l Gobiernu de Zapatero nun paga lo que yá ta fecho. Consecuencia: los trabayadores a la calle, les máquines paraes, etc.
Eso sí, si recuerden, fai menos d'un mes los diputaos socialistes, la FSA, los ministros del Gobiernu Asturianu, el propiu Areces, anunciaben qu'a Asturies nun diben afectala los recortes.
¡Otra vez más a reíse de los fatos, que pa eso se dexen!
No hay comentarios:
Publicar un comentario