Primorriverismu y concertación

Que la democracia sea un accidente -un epifenómenu- y que la cadarma real del poder s'allugue fuera de la representación popular, nes executives de los partíos políticos, en dellos estamentos de la patronal, nos sindicatos, nun ye satamente un esclusiva asturiana. Lo que ye peculiar de nós son tres coses: que esa fuerza sea tan bultable; que la estructura democrática sea tan cenciella; qu'esista tan pocu pudor pa poner de manifiestu eses dos coses: quién manda de verdá y que la cadarma democrática valga tan poco.

Porque, como vengo diciendo desayaque, esi mecanismu de la "concertación", el que la patronal, los sindicatos y el gobiernu repartan les perres del presupuestu y decidan qué facer y ónde gastalu ye primorriverismu n'estáu puru, corporativismu. Y si a daquién-y paecen términos mui fuertes estos (que, en realidá, nun son más qu'un eufemismu) que s'entrugue dos coses. La primera si esto sucede en dalgún llugar del mundu democráticu, incluidu'l restu d`España. En segundu llugar que se pregunte a qué modelu de practicidá y de despreciu de la democracia correspuende esta forma d'actuar. Y nun topará más qu'una respuesta: el corporativismu, la democracia orgánica.

Nun se nos escaeza, por ciertu, qu'esa forma d'entender la realidá y la democracia, esi despreciu polo que siempre se llamara (hasta 1990, aprosimadamente) con desdén "democracia burguesa" -non la de los obreros, la de los "burgueses" o "señoritos"- nel ámbitu de la izquierda española y del PSOE (nel que, más o menos hasta eses feches, "socialdemócrata" yera un insultu); esi desapreciu, digo, fue'l que llevó a la UGT y el so "Llenín español", Largo Caballero, a collaborar cola dictadura de Primo de Rivera.

Agora bien, lo más emolecedor de tou ello ye la "normalidá" cola qu'eses conductes pre, para o ademocrátiques cuerren ente nós, nesta Asturies del vaciamientu, l'aprobetayamientu individual y colectivu y la emigración. Eso significa una pergrave enfermedá moral y política, yá non del cuerpu social, sinón de los individuos, de los ciudadanos asturianos, de caún de nosotros, y de los medios de comunicación.

Por eso, estoy seguru, si dalguna vez toa esta xente que tien esti comportamientu tan anómalamente democráticu y tan afelpeyadamente estéticu, al parase a pensar sobre lo que faen, sufre un surtíu d'esmolición, va chalu pal delláu, y escobiará cualquier esmolecimientu o rocea. El bálsamu seremos nosotros, los ciudadanos que callamos, y especialmente los sos votantes. Y d'esti mou van escobiar cualquier puyu d'inquietú: "a gustu del amu -proclamarán-, palos al burru".