Basures y educación

                            

(Asoleyóse en La Nueva España de ayer, 24/06/2019)

                            L’APRECEDERU      

         

                            BASURES Y EDUCACIÓN

               Cuando s’acerquen el veranu y les vacaciones, una recatafila d’asociaciones de toa triba, asina como tropielles d’escolares, acérquense a playes, ríos y praos p’atropar les basures. La mayoría de la basoria que se recueye son plásticos, pero hai de too.

               Hai llugares onde la singularidá de los oxetos recoyíos fai d’ellos un vertederu peculiar. Per exemplu, nel puertu deportivu de Xixón suelen somorguiase tolos años un grupu de buzos de Cruz Roxa y de la Federación Subacuática, pues bien, aparte tonelaes de basoria, salen d’ehí coses como váteres, pieces de coches y llavadores... Ún entiende (esto ye, nun defende, critica pero entiende) que los munchos bebedores de la zona —o los usuarios de motores y veleros— tiren al agua botelles y plásticos. ¿Pero quién carreta un váter o una pieza una llavadora pa tiralos en puertu? ¿Llévenlos al costín?

               Más allá d’eso, faese ún dalgunes reflexones. ¿Esa xente de venti o trenta años que llanza al agua plásticos y botelles envede devolveles al chigre o poneles en contenedor nun tuvieron durante la escuela y l’institutu miles de charles sobre ecoloxía y meyuambiente? ¿Nun visitaren toos Coxersa pa concienciase?

               ¿Tantos escolinos como salen añalmente a llimpiar el mediu nun son los mesmos, o de los mesmos centros, que dexen perdíu de desperdicios del almuerzu’l patiu durante’l recréu? ¿Toos esos rapazonos qu’empuerquen los praos de les fiestes o los recintos universitarios colos cristales y los plásticos del botellón nun son los qu’enllenaron les aules de murales pa concienciar y salieren en manifestación pol meyuambiente?

               Por eso, cuando siento afirmar a los buenrollistes nefelibáticos qu’eses coses son un problema d’educación, lo mismo que pa otros conflictos dicen que nun hai que sancionar, sinón educar (o dialogar), siempre m’entrugo: ¿en qué mundu viven?

               Toi seguru que cuando Caín mató a Abel yá había un buenrollista que dixera: “Eso nun se soluciona con castigos, lo que fai falta ye educar”.