El 27 de marzu asoléyase'l Real Decretu pol que se prorroga la declaración del estáu d'alarma del 14 del mesmu mes. La prórroga trae una novedá, la suspensión de toles actividaes non esenciales. Cuáles son les actividaes esenciales nun se sabe bien, hasta qu'un Decretu de casi les 12 la nueche del domingu 29 vien a embarullalo.
Nesi Decretu del 27 suspéndense les actividaes nun esenciales hasta'l 12 d'abril. Los que dexen de trabayar van seguir cobrando de la empresa, pero tienen que recuperar les hores perdíes cuando vuelvan al tayu, hasta finales d'añu.
A les 9 la nueche del 12 d'abril, tres hores enantes de que los trabayos y trabayadores tornen a trabayar, apaez una Orde de Sanidá especificando que, de tolos trabayadores que teníen que reincorporase de la construcción, los que trabayen n'obres de reparación nun puen facelo, pol peligru que tengan contactos colos vecinos de los edificios colos que trabayen.
¿Y estos trabayadores cómo queden? ¿Tienen que face-yos un ERTE? ¿Tien que despedilos la empresa? ¿Siguen cobrando ensin producir? Nin una palabra por parte'l Gobiernu, que sigue coles sos chapuces de toa triba.
¡Yá, yá verán los enguedeyos xurídicos de too esto!
Por ciertu, cónstame que trabayadores n'obres de reparación taben incorporaos esta mañana al trabayu, y que lo facíen pol Decretu que conocíen, el de la vuelta al trabayu. Nada sabíen de la nocherniega Orde de Sanidá (confusa abondo, como tantes otres, por ciertu). Nin ellos nin la empresa, a lo que camiento.
No hay comentarios:
Publicar un comentario