PALLABRES
ENSIN PESU, PALLABRES POSAES
A diariu atopa uno nos medios
pallabres ensin pesu, pallabres que nun tienen más sustancia que los fonemes
colos que se sustancien, yá porque nun sepa bien lo que diz el que fala, yá
porque quiera ocultar daqué.
“Que se sepa la música no transmite el virus”, diz José Luis Álvarez Almeida, presidente d’OTEA, pa quexase del pieslle de los bares nocherniegos. Y ye verdá, pero, al marxen d’otres cuestiones, sabe bien qu’eso ye un sofisma: la música nun tresmite’l virus, pero pue trespasase ente los clientes qu’acuden a les hores del esperteyu a sentila y tomar copes.
Un rapaz de les Nuevas Generaciones del PP de Xixón paxarea’l so apoyu al xoven de Wiscosin que mató a tiros a dos manifestantes negros. Poco dempués el pío-pío retírase y el rapaz diz que lu trinó por error. Falso. Trinólu porque-y paeció bien facelo. Nun fue un “error”, como’l del que pon “gata” por “gota”, como quier dicir. Si acasu, fuelo nel sentíu que tien na famosa frase de Fouché, viendo les repercusiones negatives que pa Francia tuvo’l fusilamientu del duque d’Enghien: “Ye peor qu’un crime, ye un error”.
Pallabres ensin pesu, pallabres de disimulu
Llamóme l’atención una entrevista que LA NUEVA ESPAÑA fai a dos cineastes, Marcos Merino y Marta F. Crestelo, nel especial del Día d’Asturies. Poques vegaes vi tanta claridá nel análisis de lo que nos pasa: el nuestru conservadurismu, el nuestru mirar hacia atrás que nos convierte n’estatues de sal, la señardá permanente de la industria del pasáu y l’esperar siempre polo público y l’Estáu, la desconfianza hacia lo nuevo, la falta d’unidá y proyectu común, l’ausencia de tresmisión de la historia y la cultura, l’avergoñase o menospreciar lo nuestro, los mitos de l’obrerismu, el disparate de formar mozos pa la emigración…
Pallabres de pesu. Dícennos, valiéndonos d’Ortega: “Nun queremos saber lo que nos pasa y eso ye lo que nos pasa”.
No hay comentarios:
Publicar un comentario