Un verano en Beberino

Acabo de terminar Un verano en Beberino, un llibru de Luis Roda García, editáu por EOLAS ediciones. Estupendu. Bien escritu, en primer llugar, esto ye, precisu na espresión, claru no que se tresmite, ricu nel vocabulariu, de sintasis ordenada, con ritmu. ¿Ye una novela? Non, nun ye una novela. El so conteníu fundamental son les memories de "los veranos" en Beberino, en Pola de Gordón, dende los años 50 a los 70, fundamentalmente, esto ye, cuando munchos asturianos pasaben aquellos llargos veranos de dos o tres meses en Castiella "pa secar". El filu qu'une tola materia evocativa-descriptiva ye una tenue presencia del narrador y la so evolución, de neñu a adolescente, a lo llargo d'aquellos años. Neses memories apaecen personaxes, vehículos, vezos y costumes, paisaxes, naturaleza, na midida que'l narrador taba presente nelles y les recuerda o reflexona sobre elles. Una cierta emoción, una cierta señardá, acompaña munches vegaes a esos pasaxes, personaxes o conductes, que a la vegada, vienen marcaos pol pasu del tiempu personal y colectivu, el d'una Beberino que, de ser un verbeneru nos veranos, va camudando nun pueblu de onde van esapaeciendo los veraneantes na midida que'l Mediterraniu entama ser un destín más atractivu y " yá posible". Toa esa materia y señardá van tener inevitablemente más atractivu pa los llectores de cierta edá, aquellos que vivieron o tuvieron cerca aquellos años, digamos, de tiempu llentu, vida na cai y sociabilidá xeneral no prósimo, anque inxamás pisaren el León o la Castiella "de secar". Pero nun ye solo esi l'encantu del llibru, son prestoses les aportaciones culturales, los símiles o reflexones que tienen el sofitu na lliteratura clásica, na música de la época, na cultura lliteraria de la Ilesia.Y non cosa roína ye'l procedimientu discursivu-memorísticu de dir entevenando, a cada triquitraque, pequeñes desviaciones de la materia que se ta tratando, enxertos provocaos por esa materia, caleyos secundarios que se recuerren pa volver al camín principal dempués. A mi prestóme, y téngolu, por interesante y de magnífica escritura.