¡Adiós a Chupa-Chups!

"Nun siento'l barcu -diz el cantar-, siento'l pilotu y la tripulación". Pues yo igual, lo primero que siento son los empleaos, los trabayadores de Chupa-Chups, pa caún de los cualos el cierre la fábrica (y pa la mayoría'l paru) ye un drama personal y familiar.

Pero siéntolo tamién pol empléu: esos puestos de trabayu nun volverán ocupalos otros piloñesos nin piloñeses; tresportistes perderán empléu o rentes y van vese empufaos; los bares, los quioscos, les tiendes que dependíen d'esos ingresos van velos amenorgaos o van enfilar la bocana del cierre.

¡Siéntolo por Piloña!

Y agora una meditación: el cierre la fábrica ye guañu los tiempos. Porque requieren un tamañu (y un capital) pa les empreses que nun ye'l que se podía tener cuando, nel pasáu, se crearen tantes fábriques n'Asturies. Segundu, porque, en congruencia con ello, les decisiones empresariales yá nun dependen, na mayoría los casos, d'emprendedores individuales o de families, que podíen sofitar les sos decisiones (la restricción de ganancies, por exemplu, la voluntá d'esperar y alguardar tiempos meyores) en razones sentimentales o emocionales -que son tamién d'interés pa les persones, contables, polo tanto-, sinón que depende de conseyos d'alministración que nun tán arreyaos más que cola cuenta resultaos o cola imaxen delantre los accionistes.

Un apunte caberu: el cierre de Chupa-Chups pon la montera a la muerte una época na que fue bayurosa la llegada d'industriales foriatos a Asturies pa crear equí riqueza y empléu.

NOTA: LA IMAXEN, COMO SE VE, YÁ NUN YE MÁS QU'UN OBLERU PA LA MURNIA Y LA TRISTURA.

* semeya del archívu de La Voz de Asturias (16/09/2010)

La manona de la crisis

Dende'l 2008 la crisis vien esgatuñando en persones, families y sectores económicos. En dalgunos, como la construcción, nun fue solo esgatuñar a diariu, sinón agadañar d'esmenu y a maconaes.

Nestos díes, sobre esi menguar y eses llárimes diaries, vemos cómo nos escarnien a tayaes: conxelación de pensiones, reducción de sueldu de funcionarios.

Y, sobre la prúa xeneral qu'amuga tol estáu, de xemes en cuandu, bastiazos particulares que caen equí, n'Asturies, y que lleven consigu tierres y persones: Chupa-Chus, Venturo XXI, Rioglass Solar...

La manona de la crisis. Como la del Pesadiellu: grande, peluda, qu'afuega y dexa ensin respiración hasta matar.

Chupa-Chups

L'amenaza qu'amiya enriba la fábrica de Villamayor esmuel a cualquier asturianu con un mínimu de sensibilidá. De mano poles persones y families afectaes, dempués pola importancia económica de la factoría pa la comarca, finalmente pola tradición y la hestoria de la empresa nel conceyu, que son tamién factores cola so importancia.

A ún que, sobre asturianu, tien munches relaciones con Piloña -entre otres, siete años ellí dando clase y faciendo política nos tiempos de la Transición- duel-y especialmente esa situación.

Suerte pa que les coses rueden meyor de lo que pinten: pa los empleaos, pa les families, pa la empresa, pa Villamayor, pal conceyu de Piloña y pa la comarca.