Ún, como asturianu, taba un pocu fartucu de sentir les declaraciones de la xente'l Sporting: Emilio de Dios: "A ver si l'añu que vien seguimos en primera"; Preciado: "Mantenese en primera yá sería un gran ésitu"; dellos xugadores: "l'aspiración pal añu que vien ye seguir otru añu en tercera".
De lo que taba fartucu, hasta más enriba la montera, yera de tanta "asturianada", esto ye, de tanto dar les gracies por que nos dexen vivir ensin ser nada. Esa mentalidá de "a ver si podemos seguir comiendo un garitín al día, y gracies", ye la mesma qu'alienda en tantos asturianos y que-yos impide actuar na defensa de los sos intereses y esbrexar pol ésitu d'Asturies.
"Somos menos qu'un barriu de Madrid, asina que qué vamos pedir, vamos conformanos colo que nos den, y que nun falte". Esa frase puede resumir, como otres munches asemeyaes, tol conformismu asturianu, el nuestru derrotismu, el nuestru "qué más da".
Pues frente a eso, el señor José Fernández, el másimu accionista del Sporting, decía'l domingu na Nueva España: "A Preciado le pido que nos meta entre los diez mejores". "Están bien dos campañas para crear la base; hay que tener más aspiraciones".Un aplausu. Yá podía tener esa mentalidá tola xente del Sporting, y, especialmente, yá podía espardese esa mentalidá de lluchadores y ganadores a la sociedá asturiana.
Vamos tener que fichar a don José Fernández, polo menos d'animador y psicólogu.
