Carmen Ruiz-Tilve, cronista oficial d'Uviéu, ye una persona a la que tengo gran estimanza. Pola so cultura, pola so discreción y saber, pol so esmolecimientu poles coses del común, pol so amor a les coses d'Uviéu y del país. El día 27 d'avientu asoleyó na Nueva España un artículu llamentando l'abandonu de dalgunes pieces o llugares monumentales d'Uviéu: la capiella los Vixiles de la Catedral; l'Arqueolóxicu; la celda de Feijoo, especialmente. Pa velu, pueden pinchar equí. Y, a propósitu, el discretu y reivindicativu artículu de doña Carmen (preséntase como una carta a los Reis Magos) coincide cola enésima denuncia sobre'l mal estáu del arte asturianu (patrimoniu de la humanidá, según se sabe) y, especialmente, de San Miguel de Lliñu.
