Acabamos d'enteranos (nos caberos tiempos, digo) que Steve Jobs negóse durante munchu tiempu a tratase del cáncer y que, nel so llugar, dedicóse a buscar remedios "máxicos" n'interné. Yá saben, bébores, práctiques, alimentos, etc.
Dos reflesiones. La primera, que la intelixencia humana ye mui llimitada, y que si s'espurre munchu pel brazu derechu acúrtiase l'izquierdu.
Dos. ¡Home, paez haber una ironía tráxica nel comportamientu de Steve Jobs! Buscar él n'interné, na mayor llamarga de la hestoria, onde falen curanderos, mistagogos, mentiroses, magos, bruxos, incompetentes..., y onde val igual el que sabe que'l que non, el que fala que'l que rebuzna, el que rutia morciella que'l qu'arreciende a xazmín, la ciencia que la supersitición.
