FIGURA Y PERSONA DE DON LUIS ARGÜELLES

Durante l'homenaxe a Luis Argüelles, nel 2012

Acaba de morrer el xixonés Camilo Luis Argüelles Sánchez. Nos sos caberos años la so producción intelectual malapenes esistió, pero durante la época na que biltaren el so pensamientu y la so acción la so persona destacó nel panorama cultural asturianu.

La perspectiva asturianista de Luis Argüelles, como la de los sos compañeros de xeneración o de dómina —Luciano Castañón, José Avelino Moro, Alfonso Iglesias, ente otros—, estremaba munchu de la de la xeneración de Conceyu Bable y de les que siguen hasta agora. En xeneral, ellos aspiraben a ser «los últimos testigos» d’una cultura básicamente rural e inservible nel mundu modernu.

Nostante, toos ellos tuvieren —velis nolis— un papel importante na tresmisión de la conocencia de la cultura asturiana, que, ensin ellos, nun tendríen les nueves xeneraciones ónde conocela, darréu que —más o menos como agora— nin nos medios nin na escuela taben presentes los datos d’esa cultura, y que la opinión xeneral sobre ella, de conocela, yera de despreciu.

Dientro d’esi papel la figura de Luis Argüelles sobresal poles xeres qu’entama y lleva alantre y, cómo non (y seguramente neto que toos ellos), pol so ciñu hacia esos elementos de l’Asturies identitaria qu’ellos traten de conservar «museísticamente».

Nesi campu —y dexando al delláu los sos trabayos de mena xovellanista, nos que coincide con tantos otros estudiosos— son piqueros los sos estudios sobre’l traxe y sobre la gaita, asina como dalgunes investigaciones sobre costumes o narraciones populares.

Pero principalmente la so xera más importante ye la de la constitución y crecimientu del «Muséu Etnográficu del Pueblu d’Asturies» (el nome oficial, asina, n’asturianu, ye míu), cola ayuda de dellos de los sos amigos, aprovechando mui especialmente la construcción d’Uninsa na zona de Montiana-Veriña-Los Tacones-Serín, y cola gabita entusiasta de delles instituciones de los años sesenta y setenta («franquistes» diríen los bobos cada día más bayurosos) y la fundamental de delles persones como don Luis Adaro. Aquello tenía dalgunes deficiencies dende’l puntu de vista museísticu, pero hai que recordar que too ello facíase con poco más que Luis Argüelles y dalgún empleáu «de a pie» puestu pol Ayuntamientu. Pero la institución, al marxen de les instalaciones y de les pieces y edificios atropaos, tenía una virtú: la so popularidá, popularidá que se conseguía faciendo del Muséu un espaciu «vivu», con chigre, artesanos trabayando, música dominical, bolera, paseos y fiestes, etc.

Convién tamién recordar que, tres les primeres elecciones democrátiques, la progresería —PSOE e IU, fundamentalmente, pero también los sos corrotadores y sopelexadores— dedicárense a degradar el pueblu d’Asturies, torgar la so expansión y desfiguralu, hasta llegar a cerralu per un tiempu. El pretestu pa too ello, «naturalmente», fue que’l Pueblu «yera franquista», polos sos oríxenes, poles persones que lu formaben, porque «se decíen mises» y porque, subyacentemente, aquello de lo asturiano y la cultura asturiana yera pa la progresería (en xeneral y con poques excepciones) entá más despreciable, menospreciable o menos salvable que lo que lo yera pa dalgunos de los qu’impulsaren el muséu.

En toa esa actuación hai que decir que Luis Argüelles abrióse a coses nes que non creía y, ye más, como me confesara dalgún día, que, más qu’un imposible, paecíen-y un disparate. Y, dende esi puntu de vista, la so xera nun se llimitó a treslladar l’antorcha de los conocimientos y la empatía cultural (o «asturianista», nun sentíu llimitáu del conceptu enxertu na palabra) a les xeneraciones siguientes (digamos, pesie a la so voluntá, o de forma pasiva), sinón que facilitó la presencia y l’actividá del nuevu asturianismu, abellugando, por exemplu, nes instalaciones del Pueblu a Conceyu Bable Xixón, que pudo esparder ellí les sos idees y esponer los producciones culturales y llingüístiques feches dende la nueva perspectiva.

Ye exemplar, dientro d’esa actititú que dende l’escepticismu y la distancia daba aliendu a iniciatives distintes a la so visión de les coses, la convocatoria (afaláu por mí) del I Concursu del Pueblu d’Asturies n’asturianu, que da a conocer al so primer ganador Xosé Álvarez Fernández, «Pin el de Madrid», col so El bable de Xuanín, nel 1973 (merez la pena sorrayar que, pa esa dómina, entá nun se tien constituidu Conceyu Bable, yá non como sociedá nin como páxines escrites na revista Asturias Semanal, sinón, nin siquier, como nome).

Estes son, al marxen de les sos virtudes personales y particulares, les más destacaes xeres de don Luis Argüelles nel ámbitu de la cultura asturiana y del asturianismu tradicionales y el so papel d’enllace d’una tradición asturianista erudita, que diba esgotando, coles nuevu asturianismu, social y políticu además de cultural.

Nun se pueden pesllar estes llinies ensin señalar que, xunto col Pueblu d’Asturies, don Luis Argüelles fue una víctima —llaboral y personalmente— d’aquella furia que contra’l pasáu y lo asturianu acompangó los primeros años de casi tola izquierda asturiana y que, anque con sordina, sigue güei siendo una de les sos más bultables señes d’identidá güei. Nin ensin sorrayar qu’esa persecución y el sufrimientu arreyáu a ella llevólos con una dignidá, voluntá y bon ánimu altamente aponderatibles.