Elecciones municipales 1987, aquelles nes que, dempués de la conspiración y engarradiella nel PSOE, echen pela borda a José Manuel Palacio y ponen al timón del barcu a Vicente Alberto Álvarez Areces; les elecciones nes qu'entama la llarga carrera de don Vicente Alberto y nes que la derecha, como eternamente, nun tien el poder porque ta francía.
Imprenta Norte, calle Álvargonzález, Xixón. El candidatu d'AP encargara ellí los sos carteles. Home popular, busca'l votu de la ciudá y de los que lu conocen col nome col que se lu conoz. VOTA PACHU RIMADA, dicen los carteles al pie de la so foto, del eslogan de campaña del partíu y del emblema del partíu. El candidatu, Pachu Rimada, amira los carteles, présten-y y da'l preste.
Díes dempués, el propiu candidatu vuelve pasar pela imprenta. Hai que retirar toos, tolos carteles, que nun quede nin ún. Orden del partíu. ¡L'acabóse! ¡A quién se-y ocurre!
Nos nuevos carteles vuelve restablecese l'orden: VOTA A FRANCISCO RIMADA, dicen los carteles al pie de la so foto, del eslogan de campaña del partíu y del emblema del partíu.
Agora sí, agora les coses yá volvieren al orden. Agora yá tán les coses como tienen que tar.
No hay comentarios:
Publicar un comentario